En collaboracion amb Ràdio Occitània, Jornalet prepausa cada dimenge una entrevista àudio del podcast de la ràdio tolosana. Aquesta setmana, retrobam l’entrevista que faguèron de Lissandre Varena  al començament de genièr per remembrar lo refús de l’administracion d’escriure corrèctament lo prenom de son enfant Artús. Artús Varena nasquèt en decembre a Mende (Marjarida) e son rèirenom occitan foguèt alara refusat per l’estat civil francés. La familha a decidit de se mobilizar e de portar l’afar sus la plaça publica per tal de denónciar “l’esperit retrograd e las practicas discriminatòrias envèrs las lengas autoctònas” que la practica l’estat francés dempuèi de sègles, en renonciant pas a sa “volontat d’avalir çò qu’apelava un còp èra los patois”. Lo paire d’Artús, Lissandre, es plan conegut per far de collectatges de longa en Gavaudan e per èsser lo fondador de “Suve: Regard rural”.

Pòt semblar anecdotic, mas non o es pas… Lo resson tronant de l’afar del petit Fañch en Bretanha a permés de far veire d’autres cases dins los quals l’administracion francesa refusa que los enfants ajan un prenom dins una ortografia autra que la francesa. Es lo cas del petit Artús nascut en decembre de 2022 en Losera, que l'estat civil li refusa l’accent agut sul “u”. Son paire, Lissandre Varena, que trabalha dins l’administracion de l’Educacion Nacionala framcesa, nos assabentèt dels recorses ja entrepreses o a entreprene.