Ièr divendres 10 de febrièr, l’Euroregion Pirenèus-Mediterranèa autregèt a Tolosa los prèmis del concors joventut per de projèctes suls rets socials que promòvon las lengas catalana e occitana dins son espaci territorial. Los guierdons se remetèron en preséncia de la presidenta de la region dicha Occitània, Carole Delga, del president de la Generalitat de Catalonha, Pere Aragonés, e de la presidenta de la comunautat autonòma de las illas Balearas, Francina Armengol. L’eveniment se tenguèt dins l’encastre de l’amassada generala extraordinària de passacion de presidéncia de l’Euroregion, e foguèt precedit per de conferéncias e l’amassada de joves.
 
Los laureats dels projèctes suls rets socials per promòure l’occitan son:
   
País Invisible
 
País invisible es un produch audiovisual de l’ADÒC, l’associacion que realiza Jornalet. S’agís d’un podcast en catalan que sa tòca es de far conéisser Occitània, l’occitan e l’occitanitat al public catalan d’un biais simple, agradiu e convivial. Al total i aurà 18 episòdis d’aperaquí mièja orada cadun ont cada setmana se descobrís una vila occitana, son encontrada, las tradicions e l'istòria del parçan. A mai se presenta dins cada emission, en primièra, una cançon del nòu disc d’Ò.C. Brigada Internacional.
 
La còla de l’ADÒC anèrem a Tolosa per recebre lo prèmi e festegèrem lo guierdon a La Topina.