La part artistica del projècte, “AGDE, Vila de Bona Fortuna” consistís en un talhièr d’una setmana qu’a per tòca d’indicar lo caractèr occitan dels noms de carrièras, plaças, cais, avengudas e autres odonismes de la vila. S’agís, a partir d’una “caminada” installada dins la ciutat dagdenca, de rendre visibla la lenga d’òc dins l’espaci public. De faire viure aquela lenga, arrancada a un folclòr que n’i es tròp sovent estacada, de mercé a de creacions contemporanèas realizadas pels calandrons e lo plastician Joan-Carles Codèrc. Celebrar dins la carrièra, l’istòria, la cultura e la tradicion dagdencas d’un “biais” actual, creatiu e popular.
 
Aqueste projècte d’escòla concernís las quatre classas de la Calandreta. Comencèt tre lo mes d’octòbre amb l’ajuda d’Arnaud Sanguy (guida conferencièr de l’Ofici de Torisme) e Jean-François Castan (responsable del servici public dels musèus d’Agde). Los calandrons aguèron l’astre de descobrir dins de vesitas (gaireben d’una ora) lor patrimòni. Lo descopatge e las sortidas foguèron pensats tre lo mes de setembre, amb l’ajuda de professionals e l’ensemble de la còla pedagogica dagdenca.
 
Las reviradas e lo trabalh bilingüe son estats mestrejats per las regentas de la calandreta e Sénher Camps (especialista en lengas romanicas e ancian professor en lenga regionala al licèu d’Agde) que de per abans nos aconselhèt cèrts luòcs.
 
Dins aquel projècte pedagogic , totes los nivèls son concernits, de las pichòtas seccions cap als CM2: un mescladís de classas qu’asseguran lo caractèr brut e modèrne causit per l’intervenent. Los calandrons se veson aicí encarats a la practica del dessenh “de caractèr”. De tipografias realizadas a la man, sensibilizan encara mai lo ligam particular d’aqueles enfants en aprendissatge immersiu, a la lenga que vivon e que prepausan puèi a las dagdencas e als dagdencs. Aquò soslinha lo caractèr prigondament meridional de la ciutat.
 
Lo talhièr es pontuat per una jornada de creacion al musèu dagdenc Jules Baudou. L’idèa d’aquela estapa es pro simpla: faire sortir lo tresaur tròp sovent desconegut d’aquel musèu de las arts e tradicions popularas. Es un apròchi que permet d’agantar la riquesa e lo rebat que pòt ofrir a la vila. Aital los calandrons son convidats, coma de pichòts etnològs, a traire de formas e de detalhs d’objèctes, vestits, espleches faiçonats per una succession de generacions dagdencas. Ne resulta la matèria necessària per realizar d’òbras d’art contemporanèas que pausan lor singularitat dins una tradicion populara pròpia a la ciutat.
 
“AGDE, Vila de Bona Fortuna” es un projècte artistic e cultural ambiciós, menat per la calandreta dagdenca, portat per la regenta Anne-Laure Tobena, lo musèu agatenc Jules Baudou e lo plastician Joan-Carles Codèrc. Se materializarà per una succession d’afichas que marcaràn las diferentas estapas de la “caminada” dins lo còr de vila, un circuit artistic, cultural e educatiu bilingüe occitan-francés. Lo projècte se concretizarà dins una mòstra a la MAG, la mediatèca dagdenca, del 3 al 23 de junh, que prepausarà las òbras originalas dels calandrons e de l’artista.
 
 
 
 
Anne-Laure Tobena

 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…