Divendres 15 de març, se debanèt lo primièr vòl d’un avion comercial europèu que donèt a un grop de 40 toristas la possibilitat d’experimentar la sensacion de “gravitat zèro”. Los ocupants paguèron aperaquí 6000 èuros per sentir la manca de gravitat pendent qualques minutas.

Un airbus A300 Zéro-G, de l’entrepresa Novespace e comercializat per Avico, s’enlairèt a miègjorn de l’aeropòrt de Bordèu fins a arribar als 8500 pès de nautor —aperaquí 2550 mètres— e faguèt qualques manòbras pendent cinc minutas per aténher la sensacion de flotar dins l’espaci, sus l’Ocean Atlantic. Lo vòl durèt doas oras e mièja.
 
L’avion a l’aspècte exterior d’un aparelh comercial e, dedins, a un ample espaci de 100 m² e de mai de 200 m³ ont los toristas pòdon gaudir la sensacion de manca de gravitat. Lo torista mai veteran foguèt una femna de 67 ans.
 
Lo vòl que ven, qu’es ja complet, se farà lo 23 de junh e aquel còp s’enlairarà a París. Dempuei dimècres passat, s’es dobèrta la lista d’inscripcions per qui vòlga venir un torista gravitatòri la tardor que ven.
 
En mai d’aquela propòsta d’Avico, d’autras entrepresas prepausan d’iniciativas similaras, coma Virgin Galactic, que mena los toristas a l’estratosfèra per experimentar tanben cinc minutas sens gravitat, après pagar 200 000 dolars. Lo que gausarà viatjar a l’Estacion Espaciala Internacionala, o poirà far se paga qualques 20 milions de dolars.