capçalera campanha

Actualitats

Internacional

Tèrratrem en Orient: Siria afronta la tragèdia gaireben sens ajuda internacionala

Après 12 ans de guèrra civila, lo tèrratrem afècta un mosaïc de territòris contrarotlats pel govèrn d’Al Asad, de combatents curds, diferents grops armats e de jihadistas

Tèxte legit

La tragedia causada pel tèrratrem en Turquia, Siria e Curdistan compta cada còp mai de mòrts, e met en evidéncia las diferéncias d’un costat e de l’autre de las frontièras estatalas. Del temps que Turquia a de mejans per gerir la crisi, del caire sirian la tragèdia a luòc après 12 ans de guèrra sus un territòri contrarotlat majoritàriament pel govèrn d’Al Asad, en bona part pels combatents curds, e per un mosaïc de diferents grops armats; e i a encara un bocin de tèrra jol contraròtle dels jihadistas. Tot comptat e rebatut, lo desastre afècta quatre milions de personas, dont la mitat èran ja de desplaçats, e es complicat qu’i arribe l’ajuda umanitària e de socors.
 
 
La comunautat internacionala ajuda Turquia
 
La comunautat internacionala a concentrat son ajuda mai que mai en Turquia, que compta una lista longa de mai de 400 quilomètres tocada, unes mila mòrts e 13 milions de personas afectadas. Almens 70 estats se son mobilizats per mandar d’ajuda umanitària e de socors d’Euròpa, d’Índia, de China, dels divèrses païses arabis e dels Estats Units. Del costat turc de la termièra i aurà lèu 2500 socorreires internacionals que trabalhan per trobar de subrevivents, dont la mitat son d’Euròpa.
 
 
Los curds s’autoorganizan
 
Ça que la, d’organizacions del Curdistan turc an activat de grops autonòms per ajudar aquí ont los servicis d’emergéncia estatals pervenon pas, çò rapòrta Directa.
 
 
Iran, Argeria e Russia ajudan Siria
 
Del latz sirian se compta ara mai de 1500 mòrts e mai de 3000 nafrats. Mas aquí la situacion es de catastròfa maximala. D’un caire, Occident a pas de relacions diplomaticas amb lo govèrn sirian e mai crenh que las ajudas enviadas, lo govèrn d’Al Asad las emplegue solament per las zònas jos sa dominacion. A mai, a Damasc pervenon sonque d’avions d’Iraq, Iran e de las monarquias del golf Persic. Segon l’agéncia siriana d’informacion SANA, los primièrs avions amb d’ajuda umanitària e de socors son arribats d’aqueles païses e de Russia.
 
Iraq a enviat dos avions de menjar e de medicaments, a anonciat un pont aerian per l’ajuda e a mandat un convòi amb de combustible. Iran e Argeria an mandat de flaçadas, de tendas, de menjar, de medicaments e de còlas de proteccion civila. Tanben Russia i a mandat de còlas de salvament.
 
Es complicat qu’aquela ajuda atenga los airals contrarotlats pels curds, pels rebèls o pels jihadistas.
 
De son latz, Alemanha a demandat que l’ajuda umanitària pervenga a totas las victimas, quitament las dels airals non contrarotlats per Damasc, e a promés de dons a las organizacions umanitàrias que trabalhan sus plaça, dont un milion d’èuros per Malteser International.


 
 
 
 
 

 

abonar los amics de Jornalet
 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris


I a pas cap de comentari

Escriu un comentari sus aqueste article