Vinci a realizat 4 miliards d’èuros de benefici net en 2022, çò rapòrta Reporterre. La granda entrepresa dels mestièrs de las concessions e de la construccion presentèt dijòus passat sos resultats annadièrs que rapòrtan 4,26 miliards d'euros de benefici net, per una chifra d'afars de 61,675 miliards d'euros. Aquí representa una auça del 25% a respècte de l'annada precedenta. Pel primièr còp dins l'istòria de Vinci, la chifra d'afars realizat internacionalament supèra d'ara endavant lo realizat dins l’estat francés.
 
“Lo redreiçament del trafec de Vinci Aeropòrts s'es accelerat tot long de l'annada. En Portugal, en Serbia, aital coma dins mai d’un país d'America latina, es desenant superior als nivèls atenches en 2019”, çò diguèt Xavier Huillard, president director general de Vinci, dins un comunicat. Vinci Autoestradas aficha egalament “un trafic superior a son nivèl d'abans la crisi sanitària, tant pels veïculs leugièrs coma pels camions”. A tot aquò cal apondre que Vinci espèra una “progression novèla de sa chifra d’afars” per 2023.
 
Dempuèi lo 1r de febrièr dins l’estat francés los automobilistas pagan en mejana un 4,75% de mai als peatges autoestradièrs, dont tanben los gerits per Vinci. Pasmens, lo grop aviá anonciat de gèstes comercials per atenuar la factura dels automobilistas.