Lo pus grand dirigent de la guerrilha del Partit dels Trabalhadors de Curdistan (PKK), Abdullah Öcalan, demandèt a la fin de la setmana passada a sos combatents de metre fin a las ostilitats e de se retirar al Curdistan Meridional, per fin de complir l’actual procès de patz. “Que se calen las armas e que prevalga la politica”, çò diguèt a l’escasença de l’An Nòu pèrsa (Newroz), en un messatge legit per un deputat del partit curd, lo Partit de la Patz e la Democracia (BDP), dins la principala vila curda d’Amed (Diyarbakır): “es arribat lo moment que nòstras fòrças armadas se retiren delà la frontièra. Aquò es pas la fin, es lo començament d’una èra nòva”.
 
Embarrat dempuèi 1999, Öcalan a negociat los detalhs d’un acòrdi de patz amb lo govèrn turc, coma o reconeguèt en decembre passat lo primièr ministre turc, Recep Tayyip Erdoğan. Pauc abans, Öcalan èra intervengut per metre fin a una granda cauma de la fam que seguissián de centenats de militants curds empresonats.
 
Lo conflicte entre Turquia e lo Curdistan Septentrional a causat mai de quaranta mila mòrts pendent los darrièrs trenta ans.
 
Öcalan, arrestat en Kenya en 1999, condemnat primièr a mòrt e puèi a perpetuitat en Turquia, faguèt ja una crida lo mes passat per que se liberèsse los presonièrs dels dos costats. Lo PKK liberèt uèch soldats e oficials turcs que reteniá dempuèi dos ans al Curdistan Meridional.
 
L’assassinat de tres activistas curdas conegudas, a París, lo 10 de genièr passat, representèt un còp important al procès de patz, mas l’a pas fach desralhar.