Lo govèrn de Turquia a mes en evidéncia que non dobririá pas los passatges frontalièrs amb las zònas contarotladas per las autoritats curdas en Siria, dins l’encastre dels esfòrces internacionals per far arribar d’ajuda a las victimas dels tèrratrems.
 
“Es fòra de tota possibilitat que Turquia dobrisca de passatges frontalièrs en de luòcs contrarotlats pel Partit dels Trabalhadors de Curdistan (PKK) e per las Unitats de Proteccion Populara (YPG)”, çò a declarat lo ministre turc dels afars estrangièrs, Mevlüt Çavuşoğlu, après dire a las Nacions Unidas que pòdon mandar d’ajuda umanitària a las frontièras contrarotladas per Turquia.
 
D’autre caire, Turquia a fach de nombrosas campanhas militaras contra las milícias curdas dins lo nòrd d’Iraq e de Siria, comprés lo bombardament en novembre passat del Curdistan sirian e iraquian coma revenge de l’atemptat terrorista d’Istambol del 13 de novembre.
 
Soslinhem que los tèrratrems an daissat fins ara mai de 36 200 mòrts, dont mai de 31 600 en territòri turc. A aquel bilanç tragic cal apondre mai de 4500 mòrts en Siria, compreses 1414 dins las zònas dominadas pel govèrn e environ 3160 dins los airals entre las mans de l’oposicion dins lo nòrd-oèst del país, segon las donadas de la Defensa Civila Siriana, coneguda coma los Casques Blancs.