La pojada del nivèl de la mar implica una menaça existenciala per fòrça comunautats e pòt èsser a l’origina d’un “èxode massís” de “proporcions biblicas”, çò avertiguèt dimars passat lo secretari general de l’ÒNU, António Guterres. “Dins aqueste contèxt, de païses coma Bangladèsh, China, Índia e los Païses Basses perilhan. De megavilas de totes los continents fàcian de repercussions seriosas, coma Lo Caire, Lagos, Maputo, Bangkòk, Dhaka, Jakarta, Bombai, Shanghai, Copenaga, Londres, Los Angeles, Nòva Yòrk, Buenos Aires e Santiago de Chile”, çò diguèt.
 
Lo cap de las Nacions Unidas faguèt aquelas declaracions dins un discors davant lo Conselh de Seguretat, que s'amassava per debatre de las consequéncias de l’aument del nivèl de la mar dins los camps de la patz e la seguretat.
 
 
La pojada de la mar pus granda en tres mila ans
 
Segon Guterres, l’aument del nivèl de la mar —accelerat per la crisi climatica, lo sègle passat foguèt lo pus naut dins los darrièrs tres mila ans— es un problèma, mas tanben un “multiplicador” d’autras menaças, qu’es ja a crear “de nòvas fonts d’instabilitat e conflicte”.
 
D’efièch, menaça de vidas e fragiliza l’accès a l’aiga, al menjar e als servicis medicals de milions de personas. L’intrada d’aiga salada pòt damatjar d’emplecs e d’economias entièras amb de consequéncias grèvas dins de sectors clau coma l’agricultura, la pesca e lo torisme. “Pòt greujar e destruire d’infrastructuras vitalas”, çò precisèt Guterres.
 
Per qualques comunautats e païses, lo secretari general remarquèt que lo fenomèn causarà de problèmas per lor quita existéncia, sustot se se complís las previsions mai alarmantas fachas per d’organismes scientifics.
 
 
“Èxode massís de proporcions biblicas”
 
“Lo perilh es mai que mai grèu pels gaireben 900 milions de personas que vivon dins las zònas litoralas de bassa altitud, valent a dire una persona sus dètz sus la Tèrra”, çò soslinhèt. Guterres avertiguèt que la combinason de la pojada de la mar e de l’intrada d’aiga salada dins certans ecosistèmas menaça de far venir inabitables qualques unes dels grands dèltas del Mond, coma lo dels flumes Mekong en Vietnam e Ganges en Índia e Bangladèsh.
 
 
 

Rising seas are sinking futures - threatening the very existence of some low-lying communities and even entire countries.

Cities on every continent will face serious impacts including Lagos, Bangkok, Mumbai, Shanghai, London, New York and Santiago. https://t.co/YN2le22ug6

— António Guterres (@antonioguterres) February 14, 2023