Aqueste divendres 17 de febrièr, los Dragons Catalans entamenavan la sason 2023 de Superliga a Wakefield. Onze jogaires d’Occitània e Catalonha èran sul fuèlh de match. Aquesta primièra sortida foguèt benefica amb una victòria a la clau: 38-24. Sèt ensages marcats pels Dragons: cinc pels alièrs, 3 per Tom Johnstone (que jogava l’an passat a Wakefield) e 2 per Tom Davies. Matieu Laguèrra aviá dobèrt la marca que Cesar Rougé clavèt mercé a una intercepcion. Lo ròtle de tustaire al pè es estat balhat al centre Adam Kreighan. Los Dragons van encadenar amb doas partidas a domicili: fàcia als Leopards (èx-Centurions) de Leigh aqueste dissabte, puèi fàcia a Hull FC, lo divendres 3 de març.
 
Dijòus 16, Warrington dobriguèt la sason per un 42-10 fàcia a Leeds. Divendres, Salford anèt ganhar a Leigh 20-10. Los dos clubs d’Hull ganhan: Hull KR bat Wigan 27-18 e Hull FC empòrta la victòria fàcia a Castleford 32-30.
 
En Austràlia, Saint Helens rescontrava los campions NRL, las Pantèras de Penrith. Aquí tanben se vegèt d’ensags d’alièr. Al tèrme de las 80 minutas, las 2 formacions èran a egalitat 12-12 e los angleses empòrtan lo trofèu de campions del Mond dels clubs mercé a un tombat pel punt en aur: 13-12.
 
En Championship, novèla victòria pel Tolosa Olimpic que recebiá York: 36-0. Aqueste dissabte 25, los occitans aniràn desfisar los Taures de Bradford.
 
 
Copa de França: los Singlars de Cabardés jogaràn los quarts de finala
 
A Vilagalhenc, aqueste dimenge 19 de febrièr, òm se demandèt quala formacion, la de Vilagalhenc-Argon o la del Tolosa Olimpic, jogava en Elèit 1, tant l’empresa dels locals sus la partida foguèt totala per signar una brava victòria: 44-28. Pels quarts, serà un autre afar, amb la recepcion dels Tigres d’Albi qu’an eliminat Vilanòva 52-18.
 
Per Ferrals (Nacionala), que joguèt la partida al Molin de Lesinhan, la grasa èra tròp nauta: victòria pianenca 78-22.
 
Los 3 clubs audencs d’Elèit 1 se qualifican aisidament sus las pelenas de formacions d’Elèit 2: 88-6 per Carcassona a Carpentràs, 88-0 per Limós a l’Escura, 68-12 per Lesinhan a Entraigas.
 
Vilafranca mena a la pausa mas Sent Gaudenç ganha 30-20. Suspresa a Sant Estève, ont los Dragonets, privats de cèrts jogaires partits en Anglatèrra amb l’esquipa primièra, son eliminats: 29-16.
 
Aquò balharà, pels quarts de finala, los 4 e 5 de març, en mai del VARL-Albi, un dèrbi explosiu Carcassona-Lesinhan e las partidas Limós-St Gaudenç e Avinhon-Pià.
 
 
Omenatge a Miquèl Maïque
 
Dissabte de matin, a 11h, la tribuna renovada de l’estadi del Molin a Lesinhan serà batejada del nom de Miquèl Maïque, l’ancian capitani de l’FCL e del XIII de França que foguèt tanben 12 ans de temps lo cònsol màger de Lesinhan. Lo vèspre, seguirà una partida decisiva per jogar sa mièja finala de campionat a domicili: lo dèrbi Lesinhan-Limós.
 
Son tanben al programa d’aquesta quinzena jornada las partidas Avinhon-Dragonets e Albi-Vilanòva: dos afrontaments bessons de las partidas dels ueitens de Copa! Dimenge, se jogaràn las partidas Sent Gaudenç-Pià e Carcassona-Tolosa. A l’estadi Domèc, a la fin de la partida, jol tibanèl, lo Cristian Almerge cantarà e metrà endavant son imne al club local: Los Canaris de Carcassona, un biais de marcar los ligams del rugbi de XIII e de la cultura occitana.
 
 
 
 
Alan Roch