Lo president de Russia, Vladimir Putin, anoncièt la suspension de la participacion russa del Nòu Tractat de Reduccion d’Armas Estrategicas (START), lo darrièr pache que Russia aviá signat amb los Estats Units per la reduccion e lo contraròtle de las armas nuclearas. O diguèt dimars dins l’encastre de son discors sus l’estat de la nacion, lo primièr que fasiá dempuèi que comencèt, arunan, l’invasion d’Ucraïna. Segon Putin, Russia “deu esser prèsta per far d'assages nuclears se los Estats Units los realiza abans”; totun, lo president rus precisa qu'abandona pas entièrament lo pache mas qu’i “suspen sa participacion”.
 
Aquela anóncia fa pojar mai encara la tension de la guèrra e arribèt just a l’endeman de la vesita que Joe Biden faguèt a Volodimir Zelenski. Dins son parladís, Putin s’afichèt coma la victima de las manòbras de l’Occident e prometèt que menariá la guèrra fins a sas darrièras consequéncias: “Ara qu’avèm començat contunharem”.
 
Lo messatge fasiá una mencion especiala a las regions de Luhansk, Donetsk, Zaporijjia e Kherson, que son las mai afectadas pel combat militar: “Exerciguèron lor volontat amb lo referendum d’èsser amb Russia, nòstra pàtria”.
 
La compareissença, davant totas las figuras màgers de la vida politica e civila de Russia, se tresmudèt en bilanç de la dicha “operacion especiala” qu’entamenèt fa un an. Putin tornèt dire qu’el aviá tostemps cercat una solucion pacifica en Donbass e qu'en decembre de 2021 aviá fach una proposicion, mas que tant l’OTAN coma los Estats Units i avián respondut negativament e mai amb una expansion militara: “Vòlon acabar amb nosautres e transformar un conflicte local en conflicte global, mas comprenon pas que Russia es invencibla sul prat batalhièr”.
 
Dins lo meteis sens critiquèt la preséncia militara dels Estats Units. “Cap de país a pas tantas basas de militaras coma eles, tota la planeta es plena de basas, solament basta d’agachar una mapa”.
 
A mai de criticar los Etats Units e Kyiv, Putin tanben se planguèt dels païses occidentals que segon el, an participat a la desinformacion, a barrar los uèlhs “davant las represalhas e los assassinats politics entre las mans de Kyiv”, de formar de batalhons  nacionalistas e provesir de laboratòris biologics e d'armas al “regim de Kyiv”.
 
Davant los convidats al parladís, dont de membres de las doas cambras parlamentàrias e del govèrn rus, e de personas qu’an combatut en Ucraïna, lo president rus encoratgèt la populacion russa e anoncièt divèrses investiments e d'ajudas per estimular l’economia russa. Una economia que reconeguèt greujada per las sancions e lo blocatge economic: “La tòca es de far patir nòstres ciutadans, destabilitzar nòstre pòble. Mas o an pas pogut perque nòstre sistèma es mai fòrt que çò que cresián”. Putin se felicitèt que lo PIB aguèsse davalat solament d’un 2,1% quand a l’exterior s’assolidava que lo país se poiriá escrancar.