L’èx-oligarca e entrepreneire rus Boris Berezovskii, un critic ferotge del president rus Vladimir Putin, foguèt trobat dissabte passat en cò sieu, près de Londres. Berezovskii, a 67 ans, èra una figura influenta a Moscòu pendent l’epòca de Boris Ieltzin, abans d’aver un conflicte amb Putin e de fugir al Reialme Unit en 2001. Se sap pas las circonstàncias de la mòrt; e la polícia, qu’a qualificat per ara la mòrt d’inexplicabla, a delimitat l’ostal e i a enviat d’expèrts en armas quimicas, biologicas e nuclearas.
 
Qualques oras abans de morir, Berezovskii aguèt una entrevista amb lo jornalista Ilia Zhegulev, de la revista Forbes, dins una ostalariá de Londres. Paucas oras après sa mòrt, se publiquèt qualques fragments de la convèrsa sus la version web en rus de la revista. I explica que sa vida aviá pas mai sens e que desirava tornar en Russia.
 
Berezovskii aconseguiguèt una granda fortuna dins los ans 1990 amb las privatizacions que seguiguèron la casuda de l’URSS, a l’ombra de l’èx-president Ieltzin. Amb l’ascension de Putin, los interèsses de totes dos s’opausèron.
 
Lo magnat subrevisquèt a qualques ensages d’assassinat, quitament a un atac amb bomba que decapitèt son menaire. En 2003, demandèt asil politic al Reialme Unit en allegant que sa vida èra en perilh en Russia.
 
 
Amic de Litvinenko
 
Berezovskii èra amic de l’èx-agent del KGB Aleksandr Litvinenko, installat tanben a Londres, que moriguèt empoisonat en 2006 pels efièches del polòni 210, un material radioactiu qu’ingeriguèt après èsser anat prene lo tè. Lo Cremlin acusèt implicitament Berezovskii d’èsser un dels responsables de l’assassinat. Mas el neguèt las acusacions e, per contra, diguèt qu’èra lo quite Putin qu’aviá ordenat lo crime.
 
Sas finanças èran tanben dins un marrit moment, sustot après aver perdut arunan una demanda per damatges e interèsses contra l’oligarca pròche del regim de Putin e proprietari del Chelsea, Roman Abramovich, a prepaus de la venda de las accions de la companhiá petrolièra Sibneft.