Se reprenguèt divendres las convèrsas entre los executius còrs e francés sus l’autonomia de Corsega. S’èran arrestadas en setembre passat en seguida de decisions judiciàrias polemicas suls presonièrs còrses qu’emmalicièron las autoritats e los partits còrses.
 
 
Las linhas rojas de Macron
 
La reünion de divendres sul futur institucional de l’illa recebèt un convidat inesperat, lo president francés, Emmanuel Macron. La màger autoritat francesa i remembrèt las doas linhas rojas de París: Corsega deu demorar dins la Republica Francesa e se pòt pas crear “doas categorias” de ciutadans. D’efièch, una de las revendicacions còrsas es la creacion d’un estatut de resident que permeta solament als qu’aurián residit dins l’illa un temps determinat de crompar de lotjaments.
 
 
Dispausat a cambiar la Constitucion
 
Franc d’aquò, Macron a afortit que i a pas cap de subjècte “tabó” e qu'es dobèrt a totas las proposicions dels elegits còrses, tant l’autonomia coma la diferenciacion, e mai se calguèsse tocar la Constitucion francesa. La volontat del president francés es de lançar un projècte de reforma constitucionala dins l’estiu, que seriá debatut en 2023 e 2024. Es doncas urgent que se pervenga a un acòrdi abans lo mes de junh.
 
A mai d’aquel estatut de resident, los còrses tanben revendican que la lenga còrsa figure dins la Constitucion, de proposicions que semblan de mal acceptar per las autoritats francesas.
 
Segon Emmanuel Macron, l’avenir institucional de l’illa poiriá èsser inspirat de fòrça modèls mediterranèus, coma lo de las illas Balearas, en çò que tanh a la descentralizacion o la diferenciacion. Dins la reünion de divendres tanben se parlèt d’urbanisme e d’abitatge, de questions fòrça delicadas.
 
Segon lo ministre de l’Interior, Gérald Darmanin, encargat de menar las negociacions, es previst que i aja una nòva reünion abans l’estiu per discutir sus de proposicions concretas de las autoritats còrsas, puèi començaràn las consultas a l’Assemblada Nacionala francesa e al Senat.