Almens 59 migrants son mòrts dins lo naufragi d’una barcassa davant las còstas de Calàbria. La barcassa èra subrecargada e transportava aperaquí 150 personas segon qualques subrevivents. Naufraguèt dimenge vèspre a Steccato di Cutro, dins la província de Crotona. Demest las desenas de mòrts que son arribats sus la plaja d’aquela vila toristica, i a qualques enfants e un nenet.
 
Las ONG de la zòna afirman qu’an pogut salvar mai d’80 personas, mas crenhon que lo nombre de mòrts pòsca créisser. “Que tombe sus la consciéncia dels qu’empedisson per lei los salvaments, es incomprensible, inuman”, çò a dich l’ONG Open Arms. La coalicion de drecha e extrèma drecha es pervenguda al poder en Itàlia per la promessa de luchar contra las arribadas de migrants.
 
Segon los primièrs elements de l’enquista, los migrants provenián de Somalia, Paquistan e Afganistan mas la barcassa de Turquia. Lo naufragi l’aurián provocat las marridas condicions de la mar; lo vaissèl se rompèt en doas mitats en percutir una ròca a causa de las fòrtas èrsas, e los passatgièrs aguèron pas temps de cridar socors.
 
Save the Children ramenta que las personas mòrtas dins aquel naufragi s’apondon a las mai de 25 000 victimas qu’an perdut la vida en Mediterranèa dempuèi 2014.
 
La primièra ministra italiana, Giorgia Meloni, a plangut “la pèrda de tantas vidas umanas abracadas pel trafec de las personas” e s’es engatjada a trabalhar per evitar “la partença” d’aqueles vaissèls amb de migrants.
 
 

🔵 #Naufragio#Crotone 80 personas han sido rescatadas;
43 cuerpos sin vida encontrados en la costa. Se teme que se puedan alcanzar más de 100 víctimas.
Que caigan sobre la conciencia de los que impiden los rescates por ley.
Inhumano. Incomprensible. https://t.co/1Xck3YTt3G

— Open Arms (@openarms_fund) February 26, 2023