Victòria ecologista a la peirièra de Masaugas (Brinholenc); segon la cort d’apelacion d’Ais de Provença l’esplecha deu cessar sul pic. Los jutges an constatat que la peirièra aviá destruch e anava contunhar de destruire d’abitats d’espècias protegidas sens dispausar de derogacion, çò que constituís un “trebol manifèstament illicit”. Aital, lo 23 de febrièr passat, lo tribunal ordenèt a la societat SAS Provença Granulats, filiala del Grop Audemard, d’arrestar totes los trabalhs sul sit jos astrencha de 500 èuros per jorn, çò rapòrta Reporterre. La peirièra es installada en plen còr d’un pargue natural regional ont 85 espècias protegidas son estadas recensadas.
 
Dempuèi 2012, las associacions de proteccion de la natura alèrtan los poders publics del damatge ecologic d’aquela peirièra qu’extrai de granulats destinats a la produccion de betum. Mas per ara, la polícia, lo prefècte e l’Ofici Francés de la Biodiversitat an pas res fach. Es per aquò que las associacions avián sasit la justícia.