L’estat d’Israèl visquèt dimècres passat una jornada de protèstas massissas contra la reforma del poder judiciari jos la devisa “Israèl serà pas una dictatura”. L’oposicion e los manifestants veson aquela reforma coma una temptativa del govèrn de contrarotlar la justícia.
 
La jornada li diguèron “Jorn de l'Interrupcion” e quitament se faguèt un sit web e una mapa que mostrava las diferentas mobilizacions: de manifestacions, de caumas d’estudiants e del trabalh, lo blocatge de rotas e d’escarnis davant los ostals de qualques deputats e ministres de la coalicion de govèrn.
 
La reforma del poder judiciari donariá al govèrn lo contraròtle total per nomenar los jutges, compreses los de la Cort suprèma, e limitariá fòrça la capacitat dels jutges per anullar de leis que manquèsson a la Constitucion.
 
Dins la dimenjada i aguèt ja de mobilizacions nombrosas e lo cap de l’oposicion, l’èx-primièr ministre Yair Lapid, diguèt que la reforma èra un assag de “desmontar la democracia, la societat e la cultura d’Israèl”, e que la majoritat ultradrechista dins lo parlament israelian aviá entamenat una deriva totalitària. “Creson que permetrem que la Knesset venga un parlament nòrd-corean ont tot çò que se farà serà aplaudir las autoritats”.
 
 
En Palestina aumentan encara mai las violéncias
 
Dempuèi la constitucion del nòu govèrn israelian, amb de ministres de l’extrèma drecha, las tensions an crescut d’un biais exagerat.
 
Un exemple es çò que se ten dempuèi la setmana passada dins la vila palestiniana de Nablus, en Cisjordania. Lo dimècres precedent, 22 de febrièr, l’armada israeliana i tuèt onze personas, dont un enfant. En revenge, una ataca palestiniana tuèt l’endeman dos colons israelians. En seguida, de centenats de colons irrompèron amb de cotèls, de bastons, de pèiras e d'armas de fuòc dins las vilas d’Huwara, Burin, Zatara, Odala e Asira Al Qabaliyya, dins la banlèga de Nablus; lo bilanç es d’una persona mòrta, 300 nafradas, 75 ostals completament cremats ansin coma mai una centena de veituras.