Dijòus passat, lo grop feminista Femen exprimiguèt son chepic per la fatwa —prononciament non vinculant de drech islamic— emesa per l’imam de Tunis, Adel Almi. Aqueste darrièr demanda que la jove Amina Tyler siá foetada 100 còps e lapidada a mòrt per aver publicat, sus Facebook, una fòto que i apareis amb lo bust nud.

“Los islamistas radicals tunisians, representats per Adel Almi, desiran la mòrt per lapidacion d’una jove tunisiana que se faguèt una fòto ont es nuda, e la carguèron sus Facebook per aver sostengut lo movement Femen”, çò diguèt lo grop, dins un comunicat publicat sus aquel ret social.
 
Dins lo comunicat, explican que Tyler mandèt una fòto a Femen, lo 26 de febrièr, per sosténer aquel grop, e i apareis lo bust nud amb lo lèma “Fotre vòstra morala”, pintat sul sieu còrs. Puèi publiquèt una autra fòto que se i pòt legir “Lo mieu còrs m’aperten e representa pas l’onor de degun”.
 
En responsa, Almi emetèt la siá fatwa condemnatòria e afirmèt que Tyler “voliá frapar e atraire l’atencion en pausar nuda”. “Aquò vòl dire qu’a pas res de pèrdre e que pòt pas èsser conscienta de la sacralitat de la femna. Aquelas situacions devon èsser reprimidas per evitar d’eventualas catastròfas”, çò apondèt l’imam.
 
La fatwa es un edicte non legal e implica pas una condemnaacion administrativa, mas poiriá plan provocar que tota persona qu’aderisca aquel tèxt l’empleguèsse coma justificacion per menar a tèrme lo puniment prepausat per Almi.
 
Aquel imam es un òme controvertit que dirigís l’Associacion Centrista de la Sensibilizacion e de la Reforma e que, aquestes darrièrs meses, a provocat de polemicas. En setembre, argumentèt que la poligamia es un bon mejan per luchar contra lo càncer de l’utèr, pr’amor que “caldriá 130 jorns d’abstinéncia sexuala per se purificar”
 
Las de Femen an indicat que, dijòus, ensagèron de contactar Tayler “sens succès”. Donc l’organizacion a mostrat sa preocupacion per la vida de la jove. A denonciat tanben “l’islamizacion radicala e la destruccion dels ideals de la Prima Aràbia”. “Las femnas e lors valors cediràn pas davant aqueles mostres barbuts!”, çò a apondut l’organizacion feminista.
 
Après la casuda del govèrn de Zayn Al Abidin Ibn Ali, s’es produsit un ressorgiment dels movements islamistas radicals dins lo país, que plaidejan per una interpretacion estricta de la sharia e qu’an protagonizat d’atacs contra de personalitats laïcistas e d’esquèrra del país, e tanben contra de bastissas e de simbòls d’autras religions.
 
Un dels principals cavals de batalha de las fòrças reformistas del país es d’impulsar los dreches de las femnas e las libertats civilas dins lo país. Aqueles reformistas dirigiguèron las manifestacions contra Ibn Ali dins los grands airals urbans, mas capitèron pas de s’impausar a las eleccions pr’amor del sosten islamista dins los airals rurals.
 
De son costat, la fondadora de femen, Inna Shevchenko, soslinhèt que “recebèt de messatges qu’asseguran que Tyler se tròba amb sa familha e que se pòrta plan”, e mai se coneis pas las fonts d’aquelas informacions.
 
Dins l’encastre de la polemica, una autra jove tunisiana, nomenada Meriam, a publicada una fòto siá amb lo bust nud per sosténer Tyler. Aquela accion es pas estada la sola pr’amor que los rets socials son plens de messatges de sosten a Tyler.
 
Amb aquò, dimècres passat, un hacker d’ideologia islamista radicala piratèt lo sit de Femen de Tunisia per denonciar Tyler. “Gràcias a Dieu, avèm piratat aqueste sit immoral, e se Dieu vòl, aquesta brutissa desapareisserà de Tunisia”, çò publiquèt.
 
Segon lo jornal francés Libération, una femna publiquèt un vidèo per denonciar que la jove “es desequilibrada”, qu’“es una psicopata”, que “se regaudís de l’atencion mediatica a son entorn” e qu’“a de marridas companhiás”.
 
“Se la vesètz, denonciatz-la, sonatz la polícia, mas li fagatz pas mal. Espèri que pague per sos actes, pel mal qu’a fach. Ajudatz-nos a la trobar”, çò disiá la femna, que soslinhèt que sa familha es “musulmana” e que “pòt pas acceptar aquelas practicas” perque, segon son vejaire, “an fach de mal a l’imatge de la familha, de la femna tunisiana e de l’islam”.
 
L’encastre polemic de Femen e de sas accions es pas nòu, pr’amor que las lors protèstas an desencadenat de multiplas reaccions opausadas aquestes darrièrs ans. Lo grop, fondat en 2008, venguèt fòrça conegut per d’actes de protèsta en bust nud contra lo torisme sexual en Ucraïna, contra las institucions religiosas, contra las agéncias de matrimòni internacional e contra lo sexisme, entre d’autres tèmas.
 
L’escandal mai grand foguèt protagonizat per Shevchenko, que, coma gèst de protèsta contra la condamnacion las Pussy Riot, tombèt una crotz ortodòxa a Kyiiv. S’èra erigida aquela crotz coma monument als catolics de l’Èst victimas de la persecucion sovietica.
 
Femen se definís coma una organizacion de femnas activistas en bust nud que defendon lor “egalitat sexuala e sociala dins lo Mond”. “Femen es lo fondador d’una onda nòva de feminisme del millenni III e a de seguidors dins tot lo Mond”, çò ditz lor sit web.
 
Una peticion en linha s’es lançada per salvar la vida d’Amina Tyler.