Dempuèi 2015, l’Union Europèa (UE) a pagat 53,5 milions d’èuros de salaris a d’èx-foncionaris qu’i trabalhan pas pus. Las institucions de l’UE contunhan de los pagar quand quitan lor emplec cinc abans lor retirada, çò detalha lo jornal Ara. Aquelas indemnitats son en mejana de 8227 èuros mesadièrs, mas i a d’èx-foncionaris que percebon quitament 20 000 èuros per mes.
 
Lo còst de las sobras de remuneracion pòt variar segon l'institucion. En tèsta se tròba la Comission Europèa que ne fa beneficiar 174 èx-emplegats amb mai de 31 milions d’èuros. Puèi seguisson lo Parlament Europèu, amb mai de 58 èx-emplegats totjorn salariats que còstan 9 milions d’èuros, e lo Conselh de l'Union Europèa, amb 36 èx-trabalhadors e 7 milions d’èuros. Aital, segon las donadas de l’Ofici de Gestion e Liquidacion dels Dreches Individuals de la Comission Europèa, i a 309 personas qu’an beneficiat de “las sobras per interès de servici”, un cas de figura regulat que se pòt sonque aténher cinc ans abans la retirada.