Lo parlament de Moldàvia aprovèt dimars passat que la lenga se nomenèsse oficialament “lenga romanesa” dins totas las leis del país, compresa la Constitucion. Lo vòte foguèt pro estrech perque l’oposicion pròrussa refusèt lo cambiament de nom en afortissent que caldriá totjorn parlar de “lenga moldava” coma s’es fach fins ara. Lo resultat final foguèt de 56 vòtes en favor dins un parlament de 101 deputats.
 
La lei se fonda sus una resolucion de la Cort Constitucionala de 2013 qu’indicava que, malgrat que la Constitucion parle de “lenga moldava”, lo fach que la declaracion d’independéncia de 1991 faguèssereferéncia a la “lenga romanesa” coma oficiala del país implicava que se podiá pas separar lo moldau del romanés.
 
Moldàvia es, de fach, una region romanesa a l'ora d'ara devesida entre dos estats: la Moldàvia independenta, que faguèt partida de l’URSS, e Romania. Al moment de l'independéncia, l’aspiracion de bona part de la populacion èra la reünificacion amb Romania, mas las tensions amb los que volián manténer una relacion importanta amb Russia impausèron lo concèpte de “lenga moldava” e mai la lenga siá la meteissa d’un caire e l’autre de la frontièra politica.
 
A l’epòca sovietica, de fach, se russifiquèt per fòrça lo moldau, que quitament s’escriguèt amb de caractèrs cirillics e s’empliguèt de russismes tant al nivel lexical coma al sintactic, dins una temptativa de separar Moldàvia de la rèsta de Romania.
 
L'invasion russa d’Ucraïna a fach pojar la tension en Moldàvia, qu’ara se sarra mai de Romania e de l'Union Europèa. La restitucion del nom de la lenga s’es interpretada coma un pas de mai devèrs aquel raprochament.