La polícia grèga a panat d’argent e d'objèctes de valor a de milièrs de migrants qu’an demandat l’asil al país dins las darrièras sièis annadas, segon una enquista publicada pel jornal espanhòl El País e pel grèc Solomon. 20 000 migrants, al minim, son estats victimas dels panatòris de las fòrças de seguretat grègas, qu’an empochat mai de dos milions d’èuros en liquid.
 
Segon l’enquista, los agents arrestava las personas en situacion irregulara e las retenián dins de comissariats, de casèrnas de l’armada o de magazins abandonats. Un còp aquí, lor rebutavan lo drech de demandar l’asil, las tractavan amb violéncia e lor raubavan l’argent e los objèctes de valor. Après tot aquò, las metián dins de barcas gonflablas e las obligavan de tornar en Turquia per lors pròpris mejans.
 
Lo govèrn de Grècia assegura que ne sap pas res. Totun, qualques ONG umanitàrias an confirmat als investigators l’existéncia d’aquelas practicas.