Se tenguèt dimars passat, 7 de març, dins tot l’estat francés, la tresena jornada de cauma interprofessionala contra la reforma de las pensions de retirada anonciada pel govèrn d’Élisabeth Borne, que recuola l’edat de retirada a 64 ans. Sens donadas oficialas, s’estima que la participacion foguèt mai nombrosa que las doas caumas precedentas. Segon Le Monde, s’agís d’una de las mobilizacions mai importantas dempuèi 1995. Segon la CGT, 3,5 milions de personas se serián mobilizadas, del temps que lo Ministèri de l’Interior francés estima la chifra a 1,27 milion. I auriá agut unas 300 manifestacions, dont dins las principalas vilas occitanas.
 
 
Nòva mobilizacion dissabte que ven
 
Ièr dimècres, a l’ocasion de la jornada pels dreches de las femnas, se faguèt tanben de mobilizacions. Los sindicats decidiguèron dimars de ser de mobilizar tornarmai dissabte que ven, en renovelant lo meteis exercici que fa un mes amb doas protèstas pròchas, amb l'idèa que son pas los meteisses obrièrs que manifèstan en setmana e dins la dimenjada. En mai d’aquò, s’anoncièt un autre rendètz-vos a l’entorn del 15 de març, jorn probable de la reünion de la comission mixta paritària ont deputats e senators an de trobar un acòrdi sul tèxt.
 
“Una situacion explosiva”
 
“A l’ora d’ara, las mobilizacions enòrmas conduchas per una intersindicala unida an pas recebut cap de responsa de part del govèrn. Aquò pòt pas pus durar”, çò estiman los uèch sindicats. Denóncian lo “silenci” del cap de l'estat dins lo qual veson “un grèu problèma democratic” que poiriá menar a una “situacion explosiva”.
 
La reforma de las pensions de retirada compta pas sul sosten popular. Dins l’Assemblada Nacionala francesa, los partits d’esquèrra, l’extrèma drecha e quitament qualques deputats conservators dels Republicans s’i opausan. Lo govèrn compta justament suls Republicans per que s’apròve aquela lei.