Lo Tribunal Administratiu de Bastia a anullat las deliberacions de modificacion dels reglaments interiors de l’Assemblada de Corsega e del Conselh Executiu que permeton los debats en còrs, e considèra que solament lo francés deu èsser la lenga dels debats, çò rapòrta Corse Net Infos. Los jutges an seguit un recors contenciós que lo pausèt fa qualques meses l'èx-prefècte de Corsega, Pascal Lelarge.
 
Per mièg febrièr 2022, quand èra a mand de quitar sa carga de prefècte après 19 meses de conflicte dobèrt amb lo govèrn còrs, Lelarge decidiguèt d'atacar aqueles dos tèxtes legals. Pel prefècte francista i aviá doas formulacions inacceptablas: que “l’Assemblada e lo Conselh Executiu son garents dels interèsses materials e morals del pòble còrs” e que las lengas dels debats “son lo còrs e lo francés”. Coma es abitual dins lo francisme excluent, aquelas formulacions se considèran “contràrias a la nocion de Republica una e indivisibla”, e a l’article 2 de la Constitucion qu’establis que “la lenga de la Republica es lo francés”.
 
Lo president de l’executiu còrs e la presidenta de l’Assemblada jutjan qu’acceptar aquela situacion “es impensable”, e an anonciat que farián apelacion d’aquela decision de la justícia. A mai, asseguran que tot aquò “fa pas que confirmar la necessitat absoluda d'una revision constitucionala, sustot per garentir a la lenga còrsa l'estatut de cooficialitat, condicion indispensabla de sa subrevivéncia e de son desvolopament”.
 
Fin finala, ramentan que “lo reglament de l’Assemblada de Corsega foguèt adoptat a l’unanimitat”.
 
 

Le Tribunal administratif de Bastia, saisi par l’Etat, annule les règlements intérieurs de l’Assemblée de Corse et du Conseil exécutif qui disposent que « les langues des débats sont le corse et le français » pour non-conformité à l’article 2 de la Constitution. Notre réaction ⤵️ pic.twitter.com/2AX5QTgIz4

— Gilles Simeoni (@Gilles_Simeoni) March 10, 2023