Un grop d’encagolats ataquèt divendres de ser a Atenas l’èx-ministre de las finanças grèc Giannis Varoufakis. L’incident se passèt mentre que lo politician sopava dins un restaurant del centre vila atenenc d’Exarchia amb qualques collègas europèus del Movement Democracia en Euròpa 2025. Segon un comunicat de la formacion, un pichon grop de mercenaris assautèron lo luòc e acusèron l’èx-ministre de s’èsser somés als desirs de la tròika. De mèdias grècs comptan environ una vintena d’assalhidors.
 
Malgrat que Varoufakis ensagèsse de calmar la situacion e d'establir un dialòg amb los atacaires, sos esfòrces recebèron una responsa violenta e lo grop lo comencèt d’agarrir en filmant la scèna, segon lo comunicat del movement de l’èx-ministre. Varoufakis a dich suls rets que sos agressors èran de mercenaris, qu’èran encagolats al moment de l’assaut e que semblavan de far pas partida de cap de grop anarquista ni d'autre caire politic.
 
L’economista èra una de las caras mai conegudas de la resisténcia del govèrn del país en 2015, qu'afrontèt la dicha tròika —la Comission Europèa, la Banca Centrala Europèa e lo Fons Monetari Internacional. Varoufakis voliá pas signar un nòu salvament economic contra de mesuras d’austeritat perque cresiá que significarián una condemnacion pel pòble grèc. Fin finala, lo govèrn de Syriza acceptèt las demandas d’Euròpa e lo ministre demissionèt.
 

 

By they bye: They were not anarchists, leftists, communists or members of any movement. Thugs for hire they were (and looked it) who clumsily invoked the lie that I sold out to the troika. We shall not let them divide us. Onwards! 2/2

— Yanis Varoufakis (@yanisvaroufakis) March 11, 2023