Deth 7 ath 10 de març, 49 gafets de 5u e de 4u deth collègi Emile-Paul Vayssié d’Aurinhac (Baish Comenge) que participèren enà un viatge pedagogic en Lengadòc e en Provença, acompanhats per sòns professors d’occitan, de latin,  de sciéncias dera vita e dera tèrra e d’educacion fisica e esportiva.
 
Eth 7 de març, eths collegians que’s triguèren a Besièrs on descobriren eras arenas deths taures. Qu’estèren tanben arrecebuts ena mediatèca deth CIRDÒC on profitèren de ua iniciacion a un espòrt tradicionau occitan practicat en uns quantis païses europèus, en Brasiu e en Japon: eth tambornet.
 
Eth endeman, despuish eth sòn camp de basa de Someire, eths joenis comengeses que se n’anèren enà Nimes, on visitèren eth Musèu dera Romanitat, eras arenas anticas e era vila vielha.

Eth dijaus, eth grope que passèc era jornada en Camarga, on gràcias a un jòc de pista ena sanha de Vigueirat e après ara visita deth parc ornitologic deth Pont de Gau, prengueren consciéncia dera riquessa mès tanben dera fragilitat d’aqueth espaci naturau. Eth ser, un còp tornat a Someire, eths collegians qu’arrencontrèren Danís e Veronica, deth grop Coriandre. Aqueris dus intervenents que les presentèren un espectacle a basa de condes e de danças tradicionalas.
 
Entà acabar, eth divendres 10 de març, en tot tornar-se’n, eth grop que s’arrestèc a Pesenàs. Ath programa: visita deth centre istoric e evocacion deths dus personatges emblematics, eth duc de Montmorency e Molière, que merquèren totis era istòria dera vila e de Lengadòc, ath sègle XVIIu. Era vrespada, eths gascons d’Aurinhac que huren arrecebuts ath collègi Jean Bène on poderen arrencontrar escolans de 4u qu’estúdian coma eris eth occitan, en tot participar a talhèrs esportius: petanca, quilhas de siés e tambornet.
 
Eths collegians d’Aurinhac que deven ara realizar un quasernet de viatge, damb comptes renduts deras visitas, impressions, illustracions, en tot ahíger quauque petit objècte personau. Aqueras produccions que seràn presentadas aths parents ath mes de junh. Pareish tanben qu’eths escolans de Pesenàs poderián vénguer en viatge en Comenge eth an que venc...



JPF
 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…