Lo Reialme Unit pensa pas de tornar a Grècia los marbres del Partenon, coneguts coma los Marbres d’Elgin, que son expausats al Musèu Britanic (British Museum) a Londres, e mai siá un ponch de las negociacions pòst-Brexit. Fasiá mai d’un an que las autoritats britanicas e grègas n’èran a parlar.
 
Lo primièr ministre del Reialme Unit, Rishi Sunak, assegura qu’es pas previst de cambiar la lei per restituir a Grècia los marbres. “Lo Reialme Unit a sonhat los marbres d’Elgin pendent de generacions”, çò a dich Sunak als mèdias dins l’encastre de son viatge als Estats Units. A mai, defend que son un “actiu enòrme” pel Reialme Unit.
 
“Partejam los tresaurs amb lo mond e lo mond venon al Reialme Unit per los veire. La colleccion del Musèu es protegida per la lei e avèm pas de plans per la cambiar”, çò a dich. La Lei dels Musèus del Reialme Unit empedís la restitucion de pèças d’un biais permanent, franc de circonstàncias fòrça especificas.
 
Lo Musèu Britanic de Londres a totjorn refusat de tornar las esculturas. Las emportèt d’Atenas al sègle XIX l’ambaissador britanic a Istambol, Lord Elgin, quand Grècia èra dins l’Empèri Otoman. Aquel musèu expausa d’autras pèças de l’anciana Grècia e d’autras culturas istoricas coma l’egipciana.