capçalera campanha

Actualitats

EconomiaInternacional

Lo Crèdit Soís demanda un prèst de 50 miliards a la Banca Nacionala del país

La banca assegura que pren aquela decision per "refortir preventivament la liquiditat", après perdre lo 24% de sa valor en borsa

Tèxte legit

Lo Crèdit Soís a demandat un prèst de 50 miliards de francs soïsses, çò es environ 50,7 miliards d’èuros, a la Banca Nacionala Soïssa. La decision es arribada après una jornada negra a la borsa que la societat de Zuric clavèt amb una casuda del 24% de la valor e metèt dins lo roge las bancas europèas. Coma o a indicat lo Crèdit Soís dins un comunicat, la decision se pren per “refortir preventivament la liquiditat”. Dimècres, la Banca Nacionala Soïssa aviá assegurat qu'èra dispausada a portar de cabal a la societat bancària se n’aviá de besonh. La companhiá a causit d’ acceptar l’ajuda, après que son principal accionari, la banca saudiana SNB, refusèt de participar a l’aument de cabal.
 
“Aquela liquiditat addicionala ajudarà a manténer los afars centrals del Crèdit Soís e sos clients mentre que la banca fa los passes que cal per crear una banca mai simpla e centrada sul besonhs dels clients”, çò a afirmat la societat elvetica.
 
Delà lo prèst de la Banca Nacionala Soïssa, lo Crèdit Soís a anonciat tanben qualques operacions restacadas al rèime de gatges senior de deute per una valor de 3 miliards de francs soïsses —environ 3,04 miliards d’èuros— en títols en èuros e dolars.
 
Coma o a explicat la banca, la tòca d’aquel rèime de deute es “d’optimizar la despensa en interèsses” e aprofechar los actuals nivèls d’escotisson, que son “atractius”.
 
Lo PDG del Crèdit Soís, Ulrich Koerner, assolida que las mesuras anonciadas demòstran que la companhiá fa de passes “decisius” per se refortir mentre que contunha son plan de transformacion.
 
Dimècres, la Banca Nacionala Soïssa e l’Autoritat Supervisora del Mercat Financièr afirmèron que l'escrancament de la banca Silicon Valley metiá “pas en perilh” lor mercat perque las requeréncias estrictas de cabal e liquiditat que s’exigisson de las bancas “n’asseguran l’estabilitat”. Afirmavan tanben que lo Crèdit Soís respècta aquelas requeréncias. Pr’aquò, e dins una anóncia facha per tornar la calma al mercats, l’autoritat de regulacion indiquèt que “se foguèsse de besonh” s’aduiriá de liquiditat al Crèdit Soís.
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pitaluga
1.

Tranquilles, coma ditz l'inenarrable Le Maire, que tot va plan.

  • 1
  • 0

Escriu un comentari sus aqueste article