Las mocions de censura del govèrn francés an mal capitat.  A mancat sonque 9 vòtes a  la mocion transpartisana que la presentava lo grop LIOT e que recebèt ièr de ser lo sosten de 278 deputats de divèrses grops de l’Assemblada Nacionala francesa, de l’esquèrra fins a l’extrèma drecha. Aquel resultat talament estrech es, de fach, lo signe de la granda fragilitat del govèrn d’Élisabeth Borne. 19 dels 61 deputats dels Republicans votèron la censura contra lo vejaire del president de lor partit, Éric Ciotti, e mai dijòus anoncièsse que cap de membre de son grop sostendriá pas la mocion.
 
D’autre latz, la mocion de censura del Recampament Nacional foguèt tanplan rebutada, amb lo sosten de 94 deputats, mas aquesta aviá pas cap de possibilitat d’èsser adoptada perque los deputats d’esquèrra avián ja anonciat que votarián pas son tèxt.
 
Ara, per 9 vòtes de diferéncia, la polemica reforma de las retiradas, tala coma sortiguèt de la comission mixta paritària del parlament, serà definitivament adoptada, çò que fa preveire una granda contèsta sociala. Per tot, los blocatges, las protèstas e las caumas contunhan, amb una jornada especiala de mobilizacion prevista aqueste dijòus.
 
L’anecdòta la portèt France Info, qu’anoncièt sus Twitter la malescasuda de la mocion del grop LIOT mentre que los deputats èran encara a votar.