Er Ajuntament de Barcelona e eth Conselh Generau d’Aran desvolòpen eth sòn acòrd en matèria culturau, signat eth 19 d’octobre de 2012, qu’inclodís entre d’auti punts era oficializacion der occitan ena Municipalitat de Barcelona.

Era Comission de seguiment, presidida peth Sr. Jaume Ciurana, adjunt al baile de Barcelona en carga de Cultura e President der Institut de Cultura de Barcelona (ICUB), e peth vicesindic d’Aran, Loís Carlos Medina, s’amassèt deluns passat, 25 de març, entà seguir es punts enes que se son auançades e projectades es accions mès immediates.
 
Eth darrèr an, er Ajuntament de Barcelona a incorporat era lengua occitana –ath cant deth catalan, deth castelhan e der anglés– enes huelhes de difusion des exposicions. S’agís d’exposicions tant importantes coma “Experiments de la legió Cóndor a l’Alt Maestrat, 1938” o “Retrat de Companys” e qu’an compdat damb ua preséncia remarcabla der occitan. En exposicions coma “La força silenciosa de Liu Xia, fotografies” de composicion francesa, an vist en Barcelona aparéisher era lengua occitana ath cant des autes. En fòrça d’autes exposicions de creacion pròpria der Ajuntament de Barcelona era preséncia der occitan s’a incorporat ena madeisha exposicion.
 
Era Comission tanben reconeishec er esfòrç der Ajuntament de Barcelona entà mantier er espaci de TV en occitan en Barcelona Television (BTV), que cada setmana ofrís un espaci de cinc menutes.
 
Entre es projèctes de futur i a era volentat de promòir era preséncia der occitan en futur centre culturau El Born en tot possar conferéncies e activitats sus er occitan. En especiau enguan (2013), dempús dera inauguracion, er 11 de seteme, se projectarà ua jornada sus era Batalha de Murèth, er autrejament dera Querimònia e es tractats de Lies e Patzeries, que tant importants son estats entara Val d’Aran e entà tota Occitania.
 
Aqueres activitats se restacaràn damb eth rebrembe de 1714, que tant desastrós siguec entà Barcelona e entà Catalonha. Eth Conselh Generau d’Aran participarà activament en aguest tresau centenari en 2014, en tot desvolopar es sòns acòrds damb er Ajuntament de Barcelona.
 
Tanben hèn part des acòrds er increment dera preséncia der occitan enes activitats culturaus de Barcelona e era sua promocion en Conselh Generau d’Aran.
 
Es sinergies de Barcelona d’èster capitala de tot eth territòri de Catalonha e d’ajudar ena promocion dera identitat des sòns territòris entre en un perfècte encaish damb era volentat dera Val d’Aran de reconéisher en Barcelona era sua capitala culturau e indentitària.
 
 
 
 
JL Sans