Lo primièr ministre d’Israèl, Benjamin Netanyahu, a decidit de remandar lo procès de debat de la controversiada reforma judiciària previst per la fin de març e que donariá al govèrn un contraròtle dels jutges. La decision arriba après que lo president d’Israèl, Isaac Herzog, a demandat explicitament al govèrn de Netanyahu qu’arrèste sa reforma en seguida de nombrosas protèstas popularas. La darrièra manifestacion, fòrça massissa, se tenguèt diluns passat après la destitucion del ministre de la defensa, qu’aviá criticat la reforma.
 
Netanyahu ditz que sa nòrma se debatrà pendent la sesilha venenta del parlament israelian per fin d’aprovar la reforma a travèrs del dialòg. Totun, Herzog a exprimit lo “chepic prigond de tota la nacion”, e crei que “la seguretat, l’economia, la societat… tot es menaçat”.
 
Divèrses ministres del Likud, lo partit de Netanyahu, a anonciat que sostendriá lo primièr ministre en cas que suspendèsse la reforma.
 
Fàcia a aquela grèva crisi dins la societat israeliana, Netanyahu a assegurat que, “per responsabilitat nacionala”, prendriá “un temps pel dialòg”, mas a remembrat que la majoritat de sos aliats de coalicion sostenián la mesura e que sa volontat èra de l’impausar.