Tres mòrts, sèt nafrats dont dos son entre la vida e la mòrt, es lo pesuc bilanç d’aquela nuèch de violéncia sens precedent a Marselha, qu’a conegut la nuèch mai sagnosa dempuèi la debuta de l’annada.

Tres fusilhadas faguèron tres mòrts e sèt nafrats, dont dos demòran en urgéncia absoluda, dins los quartièrs nòrd de Marselha entre mièjanuèch e 1 h del matin, dins la nuèch de dimenge a diluns, çò a indicat la prefectura de polícia de las Bocas de Ròse. Es tròp d’ora per saber s’aqueles reglaments de comptes causats pels trafecs de dròga son ligats entre eles.
 
Aqueles faches novèls de violéncia intervenon après una fusilhada qu’a fach tres nafrats davant una botiga d’alimentacion de la ciutat Félix Pyat, que se passèt dins lo 2d arredondiment, çò rapòrta France 3 Provence-Alpes-Côte d’Azur.
 
 
De menors demest las victimas
 
Tres mòrts, sèt nafrats dont dos son entre la vida e la mòrt, es lo pesuc bilanç d’aquela nuèch de violéncia sens precedent a Marselha.
 
Dos de las victimas defuntadas son annadas d’un vintenat d’ans, la tresena es un adolescent de 16 ans. E demest los dos nafrats del pronostic vital engatjat se tròba un gojat de 15 ans, de çò que ne ditz la polícia.
 
Aqueles omicidis novèls fan pojar a 13 lo nombre de personas tuadas per bala dempuèi la debuta de l’annada dins la Ciutat Foceienca, segon un descompte de l’AFP, sus un rèireplan de trafec de dròga.
 
 
Dos mòrts e un nafrat grèu a la ciutat del Castelàs
 
La primièra fusilhada espetèt a l’entorn de mièjanuèch près de la ciutat del Castelàs. Dos òmes de 23 e 29 ans son defuntats sus plaça, un tresen es grèvament nafrat e son pronostic vital es engatjat, çò indica la prefectura de polícia.
 
Aquel quartièr, demest los mai paures de Marselha, es tristament reputat per sa violéncia ligada als trafecs de narcotics. Lo 17 de decembre passat, un òme de 18 ans i foguèt tuat per bala, la victima èra coneguda dels servicis de polícia per d’afars de dròga.
 
 
Quatre nafrats a las Aigaladas
 
La segonda fusilhada espetèt parièrament dins lo 15n arredondiment de Marselha, dins lo quartièr de las Aigaladas, delà l’autoestrada A7. Faguèt cinc nafrats.
 
Aquel quartièr es el tanben fòrça tocat pels trafecs de narcotics.
 
 
Un mòrt e dos nafrats menors a la Jolieta
 
Pauc abans 1h del matin, aqueste còp dins lo quartièr del pòrt, a la Jolieta dins lo 2d arredondiment de Marselha, se perpetrèt la tresena fusilhada. I es defuntada la tresena victima de la nuèch, de 16 ans.
 
Dos autres adolescents son egalament estats nafrats dont un dròlle de 15 ans, preses en carga pels marins-pompièrs en urgéncia absoluda, segon las dichas de la prefectura de polícia. Un autre jove de 14 ans es estat nafrat mas mens grèvament.
 
 
Quatre suspèctes interpelats
 
Las enquistas son estadas balhadas a la polícia judiciària. Per çò que pertòca una d’aquelas fusilhadas, quatre personas serián ja estadas interpeladas.


 

🔴 #Marseille : fusillade à Font-Vert (14e), trois blessés légers
👉 https://t.co/MadoE2u3cPpic.twitter.com/NFT0GJStci

— La Provence (@laprovence) March 26, 2023