“Se pòt èsser sensible e èsser cap d’un govèrn”, çò soslinhèt dimars passat Jacinda Ardern al parlament de la Nòva Zelanda dins son parladís d’adieu coma primièra ministra del país. Abilhada amb un korowai, una capa tradicionala maòri, comencèt son parladís en la lenga originària del país. “Podètz èsser ansioses, sensibles, aimables o aver bon còr. Podètz èsser maires o non, èx-mormons o non, saberuts, ploraires o abraçaires. Podètz èsser totas aquelas causas e mai podètz èsser aicí e podètz dirigir un país. Aital o ai fach ieu”, çò diguèt en tot precisar que “totes los neozelandeses deurián sentir que la politica pòt èsser un ostal per eles”.
 
Ardern passarà dins l’istòria coma la politiciana ferma e aimabla. Venguèt la primièra ministra pus jove del Mond quand arribèt a la carga en 2017 a solament 37 ans. Per son biais de gerir la crisi obtenguèt una granda reputacion internacionala après los atemptats racistas contra doas mosquetas a Christchurch en 2019.
 
 
Defensora del maòri
 
Dins son segond mandat, la dirigenta trabalhista aviá capitat a formar lo govèrn mai divèrs de l'istòria de son país. Lo 25% de l’executiu e una vintena de deputats provenián de la comunautat maòri, lo pòble autoctòn de la Nòva Zelanda. De fach, l’empatia sociala e lingüistica d’Ardern amb lo pòble maòri l’encoratgèt a n’aprene la lenga. Fa quatre ans, diguèt publicament a la television maòri del país que sa filha creisseriá en mestrejant las doas lengas: lo maòri e l’anglés. Segon Ardern, lo maòri es una lenga oficiala que “bastís tanben nòstra compreneson per la cultura” perque, segon ela, “la lenga es lo còr de la cultura”.
 
 
Podètz veire tot lo discors en maòri e anglés aicí: