Belhanda, aitanlèu la tresena minuta, balhèt l'avantatge als montpelhierencs d'un polit shot. Pasmens Tolosa, pauc dispausat a pèrdre terren un còp de mai dins la correguda per la Champions, se daissèt pas ofegar, e se saupèt crear d'ocasions fins a la pausa.

Mas Montpelhièr, en aquela fin de sason, ten una fòrça mentala impressionanta. Sabon baissar lo cap dins l'auratge, e tornar als afars quand lo moment es mai propici. La segonda tempsada, pro equilibrada, cambièt pas lo marcador. Solides darrièr (demòran la melhora defensa, amb sonque 30 gòls encaissats), los montpelhierencs se daissèron pas enganar. Quitèron lo Stadium amb los tres ponches, e fòrçan París a ganhar contra Lilla, dimenge, per se far pas distanciar. Tot se complica per Tolosa, al contrari, e auràn pas mai lo drech a l'error se vòlon esperar quicòm de la fin de sason.

 

Per Marselha, la situacion se melhora pas ges. A Lorient, acabèron amb una tretzena partida sens victòria, e l'odor a la crisi passa pas. Après los atacs sens frangetas d'Amalfitano dins la premsa, pertocant l'esperit de la còla, caliá ganhar a tota fòrça, per evitar de tombar dins un ambient òrre. Arser, manquèron lo parat, un còp de mai. Sens mancar de merit ça que la, los marselheses perdèron a Lorient (2-1), amb de gòls de Mvuemba e de Monnet-Paquet. Valbuena redusiguèt la marca, a la 78a minuta, mas sens poder revirar la situacion. L'OM demòra pegat a 41 ponches, e s'expausa ara als resultats dels autres. Mai que mai, auràn d'assegurar lo manten per qu'aquela sason mancada se càmbie pas en sason catastrofica.