Lo dijòus 30 de març de 2023, 134 mainatges de la mairala al CM2 de las calandretas de Carcassona e Viladubèrt se recampèron sul sit de Puèg Marin per una matinada de talhièrs esportius. Aquel temps especial fa resson a las Olimpiadas que se passèron en fin d’annada escolara passada. Lo principi d‘aqueles obradors es pro singular. Son de mainatges que prepausan e qu’imaginan de talhièrs a destinacion dels autres amb la figura impausada que l’activitat deu èsser compatibla tant pels pichons de la mairala coma pels grands. Las proposicions coma las concepcions se trabalhan en classa amb los regents mas la part bèla demòra dins las mans dels dròlles. Per aquela matinada ont lo solelh s’èra convidat, son mai d’un vintenat de talhièrs que foguèron prepausats amb una diversitat de las bonas. Lo hip-hop, la gimnastica, l’andbòl, los percorses de motricitat, los jòcs d’abiletat, lo fotbòl, lo rugbi, la petanca, lo mikado gigant, lo mölkky, l’oquei e d’autres encara transformèron la cort e los diferents espacis de l’escòla en un buc formidablement actiu! Lo moment ten una dimension pedagogica extraordinària per mai d’un títol. Los regents asseguran la seguretat mas accèptan a l’encòp de se descentrar. Mai observaires, descobrisson los mainatges dins de ròtles diferents. La transmission se fa e s’organiza entre pars e l’adulte ven lo garent d’aquela cooperacion. Cèrts mainatges se descobrisson dins los jòcs, de segur. Gausan faire, fan fugir cèrtas paurs en balhant la man a un autre o en fasent a dos o a tres, se rasseguran, grandisson... Pels mai pichons, l’imitacion es a l’òbra, lo grand es l’exemple dins lo bon sens e es vist coma lo que te protegís aitan coma t’ajuda. La paciéncia, que manca plan sovent dins d’autres tempses de classa, es a l’òbra dins totes los talhièrs....Los mainatges, qu’an causit de menar, capitan o o faire sens impausar amb biais e responsabilitat. Lo bilanç demòra espantat! Sus 134 mainatges totes se trapèron una plaça e totes participèron! Totas la diferéncias, filhas-dròlles, d’edat, de talha, coma las dificultats pichonas, los andicaps grands, desapareisson coma per magia....Una causa es segura, la fisança remplaça plan la paur e ten tanben lo poder formidable de balejar los pichons calhaus que pòdon polluir una cort o una escòla. De riscas? Amb 134 mainatges dins un meteis temps e dins de meteisses espacis, n’i a de segur que lo dangièr es pertot! Mas, curiosament, degun se fa pas mal! Dins lo nòstre païsatge educatiu que volèm totjorn mai segurizat, mai estructurat, mai enquadrat, pels mainatges passam benlèu a costat de quicòm de fondamental. En acceptant d’o contrarotlar pas tot, en sonhant l’acompanhament dels mainatges que se son volguts investir e en butant los autres a s’engatjar, la positivitat se met en camin. Pas de tensions, pas de paraulatges, pas de crits o de plors... Las capitadas s’encadenan e la libertat pren un sens. Liure d’anar, de faire, de faire pas, mas dins lo respècte dels autres coma del material. Se gaitan, jògan, s’entrajudan, se reconeisson los uns los autres.... Son fièrs, polits e grands...
 
Èran 134, e se volián pas batre!
 
 
 
 
Joan Francés Albert


 

Jornalet a l'escòla

Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.

 Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.

Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…