Lo mercat de Peireguers, plan conegut per la riquesa e la qualitat de sos produches, es un endrech ont se pòt encara ausir “la lenga dau país”. Es per valorizar aquel patrimòni viu que l’associacion Novelum decidiguèt de lançar lo projècte “Mon merchat es occitan”, amb la collaboracion de la comuna.
 
Dissabte passat, lo matin sus la Plaça de la Claustra, se retrobèron l’adjonch a la cultura de la comuna, Rodolphe Delcros, la delegada municipala engargada de la cultura occitana, Béatrice Laporte, lo president de Novelum, Tomàs Hirondelle, Joan-Loís Lévêque, vicepresident encargat de la socializacion de la lenga, e tanben tota una tièra de militants de l’occitan en Peiregòrd, coma Joan Ganhaire e Micheu Chapduelh.
 
Après una presa de paraula rapida e un crane Se chanta, los participants faguèron lo torn dels expausants qu’avián acceptat de participar a l’operacion per tal de lor remetre dos panelons. Un panelon que ditz l’activitat de l’expausant en occitan, e un autre que vària segon lo nivèl d’occitan del vendeire: siá “L’occitan m’agrada” se lo parla pas mas sosten lo projècte, siá “Aquí parlam occitan” se la persona es capabla de servir la practica en la lenga.
 
Mai d’un trentenat d’expausants avián respondut favorablament al projècte.
 
 
Lo programa “Aquí benleu”
 
“Mon merchat es occitan” es una iniciativa alestida de cotria amb la comuna e Novelum, dins l’encastre d’una operacion mai larga: lo programa “Aquí benleu”. S’agís de rendre la lenga mai vesedoira dins la vila de Peireguers mejançant plusors accions: de senhaletica en occitan dins lo sector salvagardat de la vila, la preséncia de la lenga suls panèls electronics municipals, la proposicion de vesitas guidadas amb de “tròç vertadiers d’occitan dedins”…