Eth 28 de mai que ven i aurà en Aran ua dobla eleccion: ath delà des eleccions municipaus es ciutadans aranesi designaràn eth Conselh Generau d’Aran, ei a díder eth govèrn deth país que siguec restaurat en 1990 dempús de 156 ans d’inactivitat e refortit damb era Lei d’Aran de 2015.

Es ciutadans aranesi que volguen votar per corrèu ac pòden hèr enquiath 18 de mai. Entà votar per corrèu cau sollicitar era documentacion en un burèu de corrèus o en linha. Eth Conselh Generau d’Aran en publique ua detalhada informacion.

Eth Conselh Generau d’Aran ei format per tretze conselhèrs elegidi laguens cadun des sies terçons. Eth terçon de Castièro elegís a 4 conselhèrs, eth des Quate Lòcs n’elegís 3, Pujòlo 2, e tanben 2 Arties e Garòs. Enes terçons de Lairissa e Marcatosa s’elegís 1 conselhèr en cadun.

En çò que tanh ara division municipau, es terçons non son bric respectats. Cau díder qu’era administracion municipau ei imposada per estat espanhòu, deth temps qu'eth Conselh Generau ei definit laguens der Estatut d’Autonomia de Catalonha, e desvolopat damb era Lei d’Aran aprovada peth parlament catalan, a compdar des revendicacions araneses.

Es conselhs municipaus d’Aran son bailejats pera figura deth baile, que dirigís eth municipi. Damb eth i a es cònsols, soent escrits “còssos”.

Aran a 9 ajuntaments, dus corresponen ara mitat dera superfícia deth país: Naut Aran (terçons d’Arties e Garòs e Pujòlo) e Vielha e Mijaran (terçons de Castièro e Marcatosa). Es auti 7 municipis son Bossòst, Les, Canejan e Bausen (Quate Lòcs) e Vilamòs, Arres e Es Bòrdes (Lairissa).