Actualitats
L’apartament mai car del Mond serà en Mónegue
Atlantico ne publica las fòtos
La Tor Odeon, a l’ora d’ara en construccion dins lo quartièr de La Rossa-Sant Roman (Mónegue), lotjarà, suls darrièrs estancis, un apartament que poiriá venir l’estança mai cara del Mond.
Lo jornal numeric Atlanticopublica las fòtos de çò que serà l’apartament mai car del Mond. Bastit sus divèrses nivèls, aurà una superfícia totala de 3300 m², aurà sa piscina infinida amb quitament un tobogan. L’abitança se metrà al mercat en 2014 e costarà aperaquí 300 milions d’èuros.
La Tor Odeon representa una de las mai grandas òbras de lotjaments d’Euròpa. Lo bastiment aurà 170 mètres de nautada en tot venir lo segond bastiment mai naut de la còsta mediterranèa, qu’integrarà 70 apartaments ultraluxoses amb de vistas sul Principat de Mónegue e la Mar Ligura.
Un primièr blòc de 24 abitanças se comercializa dempuèi setembre de 2012, entre los estancis 20n e 28n, e entre elas ja se n’es crompat uèch, a de prèses que van entre 55 000 e 70 000 èuros per m².
La Tor Odeon es òbra de l’arquitècte monegasc Alexandre Giraldi, l’estructura interiora de las estanças es de l’agéncia Alberto Pinto e l’arquitècte païsatgista es Jean Mus. Giraldi se ditz inspirat per l’estil de la “Bèla Epòca” de París, al començament del sègle XX, caracterizat per una atmosfèra de patz e d’optimisme. Ça que la, l’optimisme es de pensar que qualque jorn poirem crompar un d’aqueles apartaments.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
L'apartament "mai car del mond" ?!!! Una cibla de tria per iniciar una Revolucion… Quin manja-caganha esclavagista orgulhós e parasitic se vendrà far veire dins una gàbia de vergonha inumanista aital ?
A ieu, m'agrada l'occitan e l'arquitectura. Donca mercé per aquest article. L'occitan es per parlar de tot dau folclòre a la microtecnologia e de Mentan a Bordèu coma dau Groenland a l'Africa dau Sud.
#2 Èi trobat un -ista suu camin, es tombat dau vòste comentari :
"Aquo interessa pas los occitan"ista"s" !
Manca dus-tres occitanistas e quate afogat de dansas trad, coneishi pas frem d'Occitans interessats per "los projèctes de les associacions occitanas"...
Cèrtas, los apartaments monegascs, s'en fotem un chic, e solide, fau valorizar lo trabalh daus militants, mes la vita dau país se pòt pas redusir a l'esfèra occitanista.
Coraument,
Julien M.-B.
Aquesta informacion a pas sa plaça al Jornalet. Aquo interessa pas los occitans. Al contrari, mai d'articles sus la lenga (Domergue Sumien), la istoria e las costumas dels parçans, e los projèctes de les associacions occitanas, se vos plai.
Fagam pais !
Mercé
E ò! Quand ò a pas d'engèni òm pòt far pas que "lo mai d'aquòs del Mond". Ieu, entre la bièrra Guiness e lo Guiness dels recòrds, m'estimi mai la primièra per Sant Patric!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari