En escasença del primièr anniversari de Jornalet, avèm demandat als nòstres legeires que resumiscan en una frasa çò que representa per eles aqueste mèdia. En seguida vos en ofrissèm una seleccion.

Alan Roch (Ostal Sirventés): “Per un còp, un jornal sens ostracisme pel rugbi de XIII!”
 
Anna Geli: “Jornalet, a un nòm diminutiu que creigui, tot ath contrari, que reflectís ua realitat plan grana e transversau des diuèrsi parlars occitans e des diuèrses realitats de tota Occitània.”

Cedric Rosseu (Ràdio Occitània): “Lo Jornalet es una una pèça essenciala que mena de frescor e que, non contenta de perfaire plan lo malhum ja existent de mèdias occitans, l’afortís encara mai per tornar mai qu’una dignitat: una normalitat a la lenga nòstra.”
 
Christian Andreu: “Lo Jornalet qu’ei ua bohada d’aire navèth en un Mond ancian e des·hèit.”
 
Clamenç André: “Lo Jornalet: un rai de solelh!”
 
Daidièr Castanet: “Ara que soi partit de Lauragués per lo país de las crabas (dins las Doas Sèvras), me fa plaser de legir la lenga nòstra.”
 
Daniel Royo: “Le bon vin e le Jornalet se bevon a galet.”
 
Fabien Lecuyer (director de 7Seizh.info): “Jornalet es lo primièr jornal del matin, amb lo tè. Dempuèi un an lo legissi cada jorn!”
 
Fantassin Manel: “Lo Jornalet es estat una revolucion e a fach istòria, degun poirà negar lo ròtle qu’a agut aquel jornal numeric pionièr qu’estudiaràn los escolans de la futura Occitània liura.”
 
Franc Bardòu (escrivan): “Vesi lo Jornalet coma un element fondator de democracia, un jornal dels pòbles definits cadun per sa lenga, e que va querre l’actualitat de las luchas dels pòbles per l’autodeterminacion, la dignitat e lo respècte de cadun. Mas damòra tanben un organ de comunicacion per nos donar a conéisser unes als autres.”

Francesc Magrinyà: “Lo Jornalet es un rai d’espèr de mai per dignificar la lenga e la cultura occitanas.”
 
Garric Gardeta: “Lo Jornalet es lo solaç definitiu pels occitanofòns que son grèvament addictes a l’informacion.”
 
Gerard-Joan Barceló: “Lo Jornalet es la votz de l’occitanisme que vòl viure liure.”
 
Jaume Obrador: “Jornalet representa lo vam —coma o diriá Claudi Martí— d’un país que vòl viure.”
 
Joan Bansell: “Tant que i aurà una grana, l’espècia es pas estencha e se se cultiva ben, renaisserà.”
 
Joan M. Serra: “Es per ieu una fenèstra dobèrta a l’actualitat del país occitan, que sentissi coma fraire del mieu.”
 
Joana Truflandier: “Quauques còps la bibliotèca d’Alexàndria brutla e que’ns hèn mestièr autas votz entà sauvar la memòria deu país.”
 
Jusèp-Loís Sans (Cap de la politica lingüistica del Conselh General d’Aran): “Un prumèr anniversari, un prumèr an en que s’a satisfèt, damb fòrça succès, un besonh ena comunicacion deth mond occitan. E sonque ei un prumèr an. «Un viatge de mil quilomètres comence damb eth prumèr pas» (Laozi).”
 
Laia Fàbregas (CAÒC): “Lo cafè del matin e lo relambi del ser, es per ieu aquò lo Jornalet.”
 
Laurenç Touvé: “Lo Jornalet qu’ei la votz qu’exprimeish l’unitat d’Occitània dens l’arrespècte de la soa diversitat.”
 
Lo Passejaire: “Dins aquel monde que nos a afrancesat de sòbra, cada matin un rai del Monde nòstre s’espandís sus l’ecran de l’ordenador.”
 
Luca Poetto: “De Catalonha a Piemont: soma un pòpol. Visca Occitània, visca’l Jornalet!”
 
Patric Roux (Director d’Estivada): “Lo Jornalet, un esplech viu qu’ajuda a bastir lo país!”
 
Quentin Pagès: “Me servís plan per aver quicòm a legir en occitan!”
 
Rafèu Sichel-Bazin: “Jornalet, es essencial: 1) cal que i siá; 2) te balha tota l’informacion necessària e sufisenta; e 3) es d’esséncia per lo motor de la cultura nòstra.”
 
Rosa Salvadó: “Per ieu Jornalet es lo pont que me sarra dels fraires occitans.”
 
Sèrgi Javaloyès (InÒc): “Lo qui n’a pas lejut lo Jornalet n’as pas lejut arren de net.”
 
Simon Renaud: “Un an a fulhetar de paginas en libertat.”

Xavi Gutiérrez Riu (poeta): “365 compliments, jornalistes! Per aguesta bona informacion de cada dia, e tà que la pogam gaudir, aumens, 365 dies mès”.