La Corèa del Nòrd a anonciat dissabte que las relacions amb la Corèa del Sud se tròban en “estat de guèrra”, en seguida de l’escalada de la tension entre los dos païses e de las sancions anonciadas pel Conselh de Seguretat de l’ÒNU, segon l’agéncia de notícias nòrd-coreana KCNA. “D’ara enlà, totes los problèmas estatals entre nòrd e sud seràn tractats dins l’encastre de l’estat de guèrra”, çò afirma un comunicat especial del regim.

Lo dirigent nòrd-corean Gim Jeongeun (Kim Jong-un) ordenèt a son artilhariá de se preparar per tirar contra las basas dels Estats Units en la Corèa del Sud e lo Pacific, en seguida de la demostracion de fòrça de l’armada estatsunidenca que faguèt volar dos bombardièrs invisibles en territòri sud-corean: aital o ditz l’organ pòrtavotz del regim nòrd-corean, l’agéncia oficiala KCNA.
 
Après una reünion amb l’estat major, Gim Jeongeun “a decidit qu’es ora de far los comptes amb los imperialistas dels USA”, çò ditz la nòta, qu’afirma que lo cap nòrd-corean “a signat finalament lo plan per començar los preparatius tecnics de las fusadas estrategicas, e lor a ordenat d’èsser preparadas per se lançar, amb l’objectiu que pòscan atacar en quin moment que siá tant los USA coma lors basas e los terrens operatius del Pacific, amb entre eles Hawaii, Guam, e mai la Corèa del Sud”.
 
La Corèa del Nòrd respond ansin a l’anonci de l’armada dels USA, que dos bombardièrs invisibles americans, capables de transportar d’armas nuclearas, avián subrevolat lo territòri sud-corean. “La mission dels dos bombardièrs demòstra la capacitat dels USA de far d’atacs de precision de longa portada rapidament e a volontat”, çò ditz la mission militara estatsunidenca en Corèa del Sud.
 
Dimars passat, la Corèa del Nòrd anoncièt que las fòrças armadas prenián de posicions de combat coma responsa a las manòbras militaras “ostilas” dels USA e de la Corèa del Sud. Washington e Seol defendon que los exercicis son mèrament defensius.
 
En mai d’aquò, Pyeongyang a anullat l’acòrdi d’armistici signat amb los USA per metre fin a la guèrra de Corèa (1950-1953) e a talhat lo “telefòn roge” que connectava las armadas de cada costat de la frontièra.