Aqueste divendres 29 de març, lo president de l’Assemblada Nacionala, Claude Bartolone, èra de passatge a Carcassona per inaugurar un ostal de retirada, vesitar lo chantièr de l’espital novèl e tanben rescontrar los militants socialistas.
 
A l’intrada d’aquel rescontre, de membres de l’Institut d’Estudis Occitans d’Aude distribuiguèron de fuèlhs per denonciar lo renonciament de François Hollande pertocant la ratificacion de la Carta Europèa de las Lengas Regionalas o Minoritàrias. Lo tèxte fasiá lo parallèl entre aquel engatjament 56 e l’annada 56 on la cultura del País d’Òc patiguèt una granda torrada.
 
Lo president de l’Assemblada escambièt qualques mots amb los occitanistas, que portavan tanben doas pancartas: “E la ratificacion de la Carta Europèa de las Lengas?”,  “Una lei per l’occitan e las lengas de França: lèu o per l’an pebre?”
 
S’acontentèt de dire qu’èra conscient de la question, mas que lo Conselh d’Estat s’èra prononciat en çò que concernís la lei sus l’educacion. E tirèt camin… Lo senator socialista audenc, En Courteau, indiquèt que desesperava pas d’emendar lo tèxte sus l’escòla al Senat.
 
 
 
 
IEO Aude