Atheist es lo nom, provocatiu, d’un grop d’artistas e de sabatièrs de Berlin que creson pas en Dieu ni, tanpauc, en las sabatas de bassa qualitat. Fabrican artisanalament, dempuèi l’an passat, “de sabatas atèas”, basadas sus lo confòrt e inspiradas de l’escòla del Bauhaus, “per de gents non cresentas” de tot lo Mond. A travèrs de lor sit web, recebon fòrça comandas e an descobèrt, amb estonament, que qualques comandas enviadas als Estats Units arriban pas a lor destinacion…
 
Dins un article entitolat “USPS Discrimination Against Atheism?” (Pòsta dels Estats Units, discriminacion contra l’ateïsme?), Atheist Shoes se demanda se lo servici de corrièr postal estatsunidenc pèrd volontàriament de comandas pel fach de portar lo mot “Atheist” (atèu) plan vesedor sus l’embalatge. Per corroborar aquela suspicion, faguèron un estudi: lo 21 de novembre passat, mandèron als Estats Units 178 paquets per 89 clients de 49 estats del país, en doble; sus un paquet s’indicava la marca Atheist sus l’embalatge, e sus l’autre non.
 
Lo resultat de l’experiment es lo seguent: los paquets amb lo logotipe atèu arribèron, de mejana, tres jorns mai tard al destinatari (dins lo cas de Michigan, arribèron 37 jorns après), e nòu paquets se perdèron pel camin (solament un, per contra, entre los qu’anavan sens identificacion).
 
A partir d’aquelas donadas, los “artisans atèus” an decidit que mandaràn pas mai de comandas amb la marca visibla sus l’embalatge.