La presidenta de la Corèa del Sud, Bak Geunhye (Park Geun-hye), a avertit ièr que “respondrà amb fòrça a tota provocacion” de la Corèa del Nòrd, dos jorns après que la Corèa del Nòrd aja declarat un estat de guèrra entre los dos païses. “La rason de l’existéncia de las Fòrças Armadas es de protegir lo país e lo pòble de la Corèa del Sud, e tanben, se i a quina provocacion que siá, nos cal respondre amb fòrça dins l’estapa iniciala sens cap de consideracion politica”, çò diguèt Bak Geunhye en una reünion que tenguèt amb lo ministre de la Defensa, Gim Gwanjin (Kim Kwan-jin). Del sieu costat, Gim Gwanjin a anonciat que lo ministèri de la Defensa es a preparar “un plan de contingéncia e de dissuasion activa per neutralizar lèu-lèu quina menaça nucleara que siá o de missils balistics qu’arriben de la Corèa del Nòrd”.
 
Mentretant, creisson los chepics dins la comunautat internacionala. Los Estats Units an ja fach un desplegament militar dins la zòna, en i mandant qualques caças bombardièrs capables de lançar de bombas nuclearas. De son costat, Russia demanda de retenguda a totas las partidas implicadas e que degun passe pas “la linha de non-retorn”.