L’Assemblada Generala de l’ÒNU aprovèt dimars passat lo primièr Tractat Internacional sul Comèrci d’Armas amb lo sosten de 154 païses, malgrat l’oposicion d’Iran, la Corèa del Nòrd e Siria e l’abstencion de 23 estats de mai dont Russia. Lo tractat internacional regularà un comèrci que mòu cada an 70 miliards de dolars dins tot lo Mond. Lo tractat liga los permeses de vendre d’armas a la situacion dels dreches umans de cada país.

La setmana passada, Iran, la Corèa del Nòrd e Siria bloquèron ja l’adopcion del tractat, en obligant de far un vòte a l’Assemblada Generala que foguèt ganhada pels partisans del tèxt. Ara, cada estat poirà decidir se signa lo tractat e lo ratifica. Cal almens 50 ratificacions per que lo tractat intre entièrament en vigor.
 
Lo Tractat Internacional pel Comèrci d’Armas poirà començar de se signar a partir del 3 de junh, e intrarà en vigor 90 jorns après èsser ratificat per 50 estats. Lo tèxt fòrça los païses que l’adòpten a susvelhar plan totes los contractes d’armament per evitar de vendre d’armas als estats ont i a un embargo, coma se passa a l’ora d’ara en Siria, o ont s’escarnís los dreches umans o lo drech internacional.
 
Entre los païses que se son abstenguts al vòte de dimars, i a de grands productors d’armament coma Russia o China. Per Moscòu, lo tèxt especifica pas pro çò que cal far dins los cases de vendas d’armas als agents non governamentals coma los grops rebèls o los terroristas. De mai, se son abstenguts tanben Cuba, Veneçuèla, Bolívia o Nicaragüa. Los Estats Units, que son lo país del Mond qu’expòrta mai d’armament, an votat en favor malgrat l’oposicion intèrna de l’Associacion Nacionala del Rifle (NRA). Segon aquel lobby de las armas, la nòrma de l’ÒNU poiriá afectar los dreches dels ciutadans estatsunidencs de portar una arma.