Actualitats
Hollande es d’esquina a la paret pels dobtes se sabiá que Cahuzac aviá d’argent en Soïssa
La pression sul president francés, François Hollande, es cada còp mai granda. Lo principal motiu es l’“escandal Cahuzac”, causat per l’èx-ministre del Budget Jérôme Cahuzac qu’a admés qu’aviá de comptes en Soïssa. La demission de Cahuzac sembla pas que sufiga per calmar las tensions dins l’Estat francés. Lo primièr ministre a assegurat que l’èx-ministre Cahuzac, que deviá perseguir las evasions fiscalas en França, beneficiarà pas de cap de tipe de proteccion, mas aquò es pas pro tanpauc.
L’oposicion visa Hollande davant las recèrcas que sospièchan que lo president, o de membres del sieu govèrn, èran ja al fil que Jérôme Cahuzac aviá de comptes en Soïssa abans l’escandal. E los que considèran qu’Hollande es pas complice de l’èx-ministre, totun l’acusan d’aver agit amb ingenuitat e d’èsser pas capable de contrarotlar lo sieu govèrn pròpri.
Al mitan d’aquelas especulacions, a Hollande li a esclatat un nòu escandal. Lo clavaire de la campanha electorala que l’a menat a l’Elisi apareis dins una lista de beneficiaris de paradises fiscals. Segon çò qu’a publicat Le Monde, Jean-Jacques Augier aviá divèrsas entrepresas dins las Illas Caiman.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
pasmens la transparència dins li finanças publicas a fach d'enormes progrès se prenèm en compte l'evolucion que li a agut despuèi Mitterand. a-n-aquela epoca ,l'Elisèu e lei ministres dispausavan de fons secrets en liquide que ne fasiàn ço que voliàn, lei partits se finançavan de brica e de broca, ara tot aquo es reglat gràcia a Chirac e subretot a Sarkozy que a sotmes lo buget de la preidència de la republica au drech comun. se comparam ambe l'èra Mitterand , quanta difréncia ! eu que a erigit la messorga (la mensonja) en instrument de govèrn, qu'èra pas malaut, vos lo juri crotz de bosc crotz de ferre, entre quatre-z-uelhs, siàu pas malaut e Mélanchon son comis a l'Elisèu que lo badava...
L'oposicion manca pas d'aire. Los Sarko & C° eles confessaràn pas jamai. Rapelatz-vos quand lo Fillon defensava l'onestetat de Woerth... E an d'aliats. Ièr, lo Figarò ensagèt de far d'intòx en disent que lo parquet de Bordèus èra a mand d'anar contra l'avís dels jutges. Aqueles non, son pas de branquinòls. Aquò excusa pas totes los renègaments de la troica Hollande-Ayrault-Peillon.
Mèfi! que totas aquèlas istòrias podon far taular lo projecte alsacian e aquò òc seriá una catastròfa. Per un còp que i a pro d'elegits d'acòrdi per abandonar qualquas pebendas a fin de simplficar l'administracion, val mai que capite. Sustot que fariá nàisser una coeréncia territoriala portaira d'espèr. Los jacobins s'i son pas enganats, que fustigan lo projecte.
E pareis que sonque caldriá cambiar la republica ?
I aurà un comunicat dels manifèste-occitanistas per explicar que cal un Parlament legiferent en Occitània ?
O cal demandar al GPO o al GOD ?
Aquera mena d'escandale se debana cada dètz ans de tot biaish. Los òmis politics uglan com vèrjas espauridas, mès aquò ne durarà pas guaire (Un mes benlèu ?)
Com disèva un Marselhés entrevistat au hinestron : qu'an las clau de la botiga, que's servin ....
Am un sistèma on balham las claus de la botiga, doncas ne cau pas s'estonar.
Federacion de las Democracias Locaus o lo rambalh aqueste.
Coma ?
fRANÇA lo país ont tot es formidable, perdriá son image de magnifica Republica francesa d'excepcion que dèu èsser l'alfa e l'omèga de sos ciutadans e que dona leiçons al mond entier ?
Es imortala, quitament se de lònga i son d'escandales e de causas inacceptablas. Es impossible d'envisatjar l'imperfeccion de França e intolerable de pensar a autra causa dins l'avenir qu'al sol Estat-nacion França. Ite missa est !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari