Una coalicion de grops pacifistas e pels dreches umans als Estats Units, nomenada Ret per Arrestar la Guèrra e la Susvelhança amb los Drònes (Network to Stop Drone Surveillance and Warfare, NSDSW), a declarat abril coma mes de lucha contra los drònes o avions sens pilòt. La protèsta s’adreiça contra l’usatge que ne fa lo govèrn dels Estats Units en de païses coma Afganistan e Paquistan. Fins al 28 d’abril, se convòca d’accions de tota sòrta (mapa) per denonciar aqueles aparelhs, qu’an causat la mòrt de centenats de civils.
 
L’NSDSW a volgut focalizar la campanha suls tres grands pilars de l’indústria dels drònes, en los localizant e en los mostrant: los fabricants (del 4 al 6 d’abril), los centres de recèrca e d’assag d’aqueles aparelhs (del 16 al 18 d’abril) e las basas aerianas (los 27 e 28 d’abril). S’es aprestat d’accions de protèsta especificas dins cada domeni.
 
Solament en Paquistan, lo Burèu dels Jornalistas d’Investigacion (Bureau of Investigative Journalists) a comptabilizat que, dempuèi 2004, los drònes dels Estats Units an fach 330 atacs aerians contra de supausats objectius talibans, amb 3 247 mòrts. Entre aqueles, mai de 850 èran civils. Totas aquelas donadas apareisson sus aquesta infografia que Pitch Interactive l’a elaborada.
 
Lo Burèu dels Jornalistas d’Investigacion amassa tanben de donadas dels atacs de la CIA en Iemèn e Somalia.