Lo govèrn del territòri a dich que s’agís d’un fach “sens precedent en Canadà”. La nòva lei reconeis lo drech d’emplegar la lenga dins l’Assemblada Legislativa, dins los tribunals e dins las relacions amb l’administracion. La tòca es de garentir que l’inuit e siá la lenga d’usatge abitual en Nunavut.

“Aquel gra de proteccion legala d’una lenga autoctòna a pas de precedents en Canadà”. Aital a explicat, lo govèrn de Nunavut, l’importància de l’intrada en vigor de la Lei de las Lengas Oficialas, diluns passat: es una nòrma que plaça l’inuit, l’anglés e lo francés en egalitat legala dins aquel territòri del nòrd de Canadà.
 
Fins ara, Nunavut emplegava una lei dels Territòris del Nòrd-Oèst, que n’aviá fach partida fins en 1999. E mai se l’inuit i èra ja reconegut oficialament, lo govèrn de Nunavut considèra que, en practica, la lei dels Territòris del Nòrd-Oèst plaçava l’anglés e lo francés coma vertadièras lengas oficialas de facto, mentre que las autras lengas reconegudas avián un nivèl de proteccion inferior.
 
Amb la nòva Lei de las Lengas Oficialas —que se n’esperava l’intrada en vigor dempuèi 2008—, “los inuits en Nunavut, ara, an una declaracion clara de lor drech inerent d’emplegar la lenga inuit en plena egalitat amb l’anglés e lo francés”, çò a dich lo ministre de las Lengas de Nunavut, James Arreak.
 
La legislacion de Nunavut, jos la denominacion de “lenga inuit”, reconeis l’oficialitat de doas varietats: l’inuktitut (parlat per la majoritat dels inuits del territòri) e l’inuinaqtun.
 
La nòva lei especifica que l’inuit es la lenga pròpria de Nunavut e reconeis lo drech legal de l’emplegar dins l’Assemblada Legislativa, los tribunals e las comunicacions amb l’administracion. La nòrma prevei tanben la creacion d’un fons qu’ajude a espandir encara mai la lenga dins las escòlas de Nunavut e a la situar coma lenga d’usatge abitual dins lo país.
 
Nunavut es un territòri autonòm de mai de dos milions de quilomètres cairats, plaçat al nòrd de Canadà. La màger part de sos 32 000 abitants son inuits, mas i a tanben una proporcion significativa de non-inuits (de lenga anglesa e de lenga francesa) dins la capitala, Iqaluit. Las leis de Nunavut pretendon que tanben los non-inuits aprengan de parlar la lenga inuit.
 

 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.