Lo ministre francés de l’Interior, Manuel Valls, es estat fòrtament criticat per la drecha francesa per aver mostrat sas simpatias vèrs l’FC Barcelona. Lo ministre es catalan d’origina e un cosin de son paire compausèt l’imne de l’esquipa catalana de fotbòl. E mai s’es pauc favorable a las lengas mal nomenadas regionalas, Valls es estat criticat per manca de patriotisme francés.

De representants del Front Nacional e de l’UMP an criticat lo ministre francés de l’Interior, Manuel Valls, per aver manifestat lo sieu sosten al Barça davant las partidas de la Liga dels Campions contra lo París SG. Dins una entrevista a Le Journal du Dimanche, Manuel Valls explicava lo sieu barcelonisme e disiá que lo Barça representava “un sentiment plan fòrt que va al delà del fotbòl”. “Insuportable! Ont es lo patriotisme?”, çò disiá indignat Florian Philippot, vicepresident del Front Nacional, dins un comentari sus Twitter. “Es catalan, òm pòt comprene sa causida de còr. Mas o caliá pas far public”, çò diguèt.
 
Éric Domard, conselhièr dels espòrts de Marine Le Pen, critiquèt tanplan Valls. Per Domard es inacceptable que lo ministre considère que sas originas son mai catalanas que francesas.
 
Del sieu costat, Lionel Luca, deputat de l’UMP, diguèt sus son Twitter: “M. Valls sosten l’FC Barcelona contra lo PSG e oblida qu’es ministre al profièch de sas originas! Es son drech; mas se deviá calar!”
 
 
Manuel Valls i Gorina, compositor del Cant del Barça
 
L’afeccion de Manuel Valls, nascut a Barcelona, e sa relacion amb lo club de fotbòl van mai enlà. Valls remembrava dins l’entrevista a Le Journal du Dimanche qu’un cosin de son paire compausèt l’imne del club. “Quand èri petit, anavi al Camp Nou cada estiu. Foguèt tot un espectacle esportiu, amb Cruyff e Neeskens, lo títol de 1974. E lo sol endrech de revendicacion pendent la dictatura de Franco, qu’agonizava ja”, çò disiá lo ministre francés.