Dins lo “centre d’arrestacion” de Guantánamo, i a 166 presonièrs en de condicions insolitas. La basa dels Estats Units dins l’illa de Cuba se considèra pas territòri nacional e, en aprofechant aquò, las condicions dels presonièrs, presumidament restacats a de grops jihadistas, respèctan pas cap de convencion dels dreches umans. Dels 166 presonièrs actuals, solament tres son estats condemnats; fa tres ans, lo govèrn estatsunidenc n’anoncièt la liberacion d’86, que son pas estats liberats. La majoritat de las personas embarradas ailà sabon pas perqué i son. Lo desespèr s’es manifestat dempuèi febrièr passat en una cauma de la fam. E aital, segon lo govèrn estatsunidenc, i a ara quaranta presonièrs en cauma de la fam mas los avocats dison que n’i a 130.
 
Tre que se dobriguèt aquel camp de concentracion en 2002, se son debanadas divèrsas caumas de la fam dels presonièrs. Mas cap de cauma èra pas arribada d’èsser tan massissa coma l’actuala. Los presonièrs son isolats dins de condicions fòrça duras e lor es fòrça malaisit de s’organizar. Lo camp, contrarotlat per l’armada, aplica de nòrmas pròprias, en defòra del drech dels Estats Units o de la comunautat internacionala. En lo cas de la cauma de la fam, l’armada a reconegut qu’almens dètz caumaires son estats alimentats per fòrça per de mètges militars.
 
Dissabte, lo jornal The New York Timespubliquèt un editorial fòrça dur en reclamant que fin finala lo camp de detencion de Guantánamo siá desmantelat e los presonièrs menats a l’estrange o dins de presons regularas dels Estats Units.
 
Divendres, Navi Pillay, responsable de la politica dels Dreches Umans de las Nacions Unidas, exigiguèt tornarmai al govèrn estatsunidenc lo barrament del camp. Pillay remembrèt que l’ÒNU a denonciat Guantánamo coma un “limbe juridic”, contrari a las nòrmas internacionalas. E insistiguèt sul fach que mai de la mitat dels captius deurián èsser liberats dempuèi d’ans, segon las quitas autoritats dels Estats Units.
 
Lo president Barack Obama prometèt en sa primièra campanha electorala que barrariá aquel camp de concentracion.