Margaret Thatcher, coneguda coma “la Dòna de Fèrre”, moriguèt ièr dins son ostal a Londres, a 87 ans, a causa d’un ictus. Thatcher foguèt la primièra ministra britanica de 1979 a 1990. De fach, es la primièra e per ara la sola femna qu’es demorada al numèro 10 de Downing Street.

Amb Thatcher, arribèron al Reialme Unit lo liberalisme economic sens fren, las privatizacions del sector public, las caumas e, fin finala, un país amb de milions de caumaires e en crisi. Òm se’n remembra tanben coma una negociaira de las duras dins l’Union Europèa. Aquela politica conservatritz e intransigenta la partegèt amb son amic Ronald Reagan. Los dos amassa percorreguèron dins los ans 1980 los camins per comandar lo Mond e metre fin a la Guèrra Freja. Thatcher aguèt, de mai, la vision de reconéisser en Mikhaïl Gorbachov la figura del cambiament dins l’Union Sovietica.
 
La guèrra per recuperar lo territòri de las Illas Falkland, après l’invasion d’Argentina, signifiquèt per Thatcher un aument de popularitat, que demeniguèt pasmens amb la crisi economica. Sa fin politica venguèt quand lo partit “tory” decidiguèt de la remplaçar per John Major.
 
Los darrièrs ans de Margaret Thatcher, consagrats als omenatges e als discorses, aguèron un ponch culminant en son sosten al dictator chilen Augusto Pinochet quand aquel òme foguèt somés a arrèst domiciliari a Londres; una amistat que daissa pro clar lo caractèr d’una femna que marquèt una epòca dins l’istòria del sègle XX.