“Dins una serada, constatèrem qu’un dels nòstres amics se trobava dins la carrièra just a costat sens qu’o saupèssem. Nos diguèrem qu’aquò èra pecat, de verai, e que i caliá remediar”, çò diguèt a La Dépêcheuna còla de uèch estudiants qu’an trabalhat sus una aplicacion gratuita per esmartfòn e Internet, nomenada Neventy. S’agís d’un ret social que “se declina en dos aisses: lo privat, en permetent d’escambiar amb sos amics e crear d’eveniments, e lo public, en partenariat amb de bars e de discotècas de nuèch”, çò apond Stéphane Nimer, un dels desvolopaires.
 
Neventy cèrca de se diferenciar de qualques autres rets socials: “Los sistèmas classics del tipe Facebook son polluits d’informacions inutilas del temps que nosautres, volèm centralizar l’informacion, anar tot drech a çò essencial”, çò apond Nimer. Quand l’usatgièr intra en un luòc partenari de Neventy, lo telefòn mobil l’a identificat, e sonque li cal causir se desira qu’aquela informacion aparesca sus la siá pagina. Neventy a ja qualques 30 partenaris demest los quals podèm trapar de luòcs coma lo Saint des Sins, Chez Tonton e lo Bikini.
 
“Volèm tanplan desvolopar lo nòstre ret als musèus, restaurants o encara als teatres. Aqueles darrièrs se poiràn connectar e anonciar eles meteisses una exposicion o una happy hour”, çò precisan.
 
Neventy s’inaugurarà a Tolosa lo 8 de mai, ne podètz saber mai en vos abonar a la letra d’informacion del sit web. Tanben se pòt seguir l’etiqueta #neventy sus Twitter.