Lo CNI auriá planificat de destinar 10 milions a “neutralizar lo projècte separatista en Catalonha”
 
Lo Centre Nacional d’Intelligéncia espanhòl (CNI) a planificat, amb tot lo detalh, un plan contra lo procès sobeiranista de Catalonha, segon çò qu’a publicat lo setmanièr Interviú, que cita de fonts del quite servici d’espionatge espanhòl. Segon aquela revista, s’agís d’un raport d’aperaquí 500 paginas nomenat “Orizont après”. L’Estat espanhòl auriá despensat 10 milions d’èuros amb a “la tòca immediata” de “neutralizar lo projècte separatista en Catalonha”.
 
Aquel rapòrt, encara segon lo setmanièr Interviú, detalha tres fasas per “frenar lo projècte separatista”. La primièra consistiriá a influir dins la premsa, en promovent e en finançant, dins los mèdias catalans, la preséncia de jornalistas que vòlon que Catalonha siá dins Espanha. Una segonda fasa seriá de subvencionar los mèdias mai espanholistas qu’editan en Catalonha e de promòure lor difusion. Fin finala, lo plan del CNI prepausariá de publicar de rapòrts policièrs de presumits escandals per descreditar los politicians catalans. Segon Interviú, l’espionatge espanhòl amassa aquel tipe d’informacions dempuèi fòrça annadas.
 
D’aquel document, n’existiriá almens una còpia d’estampada e de clavada dins una de las cambras blindadas del sèti del CNI. L’òme encargat de lo redigir seriá estat “un coronèl de la Gàrdia Civila afectat a Barcelona”.
 
 
Un jornal a publicat una bandièra escocessa qu’imita la nazi e a desencadenat la polemica
 
Lo jornal conservator The Scotsman, dins son edicion de dimenge passat, publiquèt un article entitolat “Klan Alba”. Alba es lo nom gaelic d’Escòcia. Aquel article parla de qualques episòdis del faissisme escocés d’abans la Segonda Guèrra Mondiala per fin de comparar l’independentista Partit Nacional Escocés (SNP) amb l’ultradrechista Partit Nacional Britanic (BNP), e suggerir que las doas formacions farián partida de la “meteissa familha nacionalista”. La comparason polemica s’illustrèt per un imatge que combina la bandièra escocesa amb l’esvastica nazi.
 
L’article, signat per Gavin Bowd, parla d’“isteria Braveheart antianglesa” e demoniza, amb paucas frasas, una bèla partida de la societat escocesa e tot lo país. “L’electorat escocés sembla ara mai receptiu al nacionalisme radical que las camisas negras de Mosley”, çò ditz Bowd, en referéncia al partit faissista britanic qu’Oswald Mosley dirigissiá pendent los ans 1930.
 
Dempuèi que lo grop Johnston Press a crompat lo jornal The Scotsman, en 2005, aquel jornal conservator a perdut la mitat de las vendas, a licenciat la mitat del personal e a doblat lo prètz, segon çò qu’explicava fa gaire la revista British Journalism Review.